No.6942/2020-2021

State Priority Project kaltlanga cheng nuai 142.00 senga sak   District Treasury Office Building, Champhai Vengthar chu vawiin chawhnu khan Law & Judicial Minister Pu T.J. Lalnuntluanga, Champhai South bialtu MLA ni bawk chuan a hawng.

Khuallian Pu T.J. Lalnuntluanga chuan state sum leh pai chetvelna vawngtu leh innghahna pawimawh tak leh mipuite tana tangkai tak ni tur District Treasury Office thar hawn ani chu lawmawm a tih thu sawiin, Finance department changtu Chief Minister-in duhsakna a hlan thu a sawi a. Ministry hmasa atanga hmalakna lo awm tawh chhunzawma a taka tihhlawhtlin a ni chuan ram kalphung tur dik tak a tarlang a ni, a ti a.  Sum pai hman dan leh enkawl dan mumal tak chu ram inrelbawlna tura pawimawh tak anih thu sawiin,  sawrkar sum bawm Treasury Office in kan hun tawn mil ang zela inkaihhruaina an duang thin chuan   kawngro a su thui hle a ni, a ti bawk.  Treasury chu sawrkar economy inghahna, sawrkar pawisa vawnga   mamawh ang tawk zela pe chhuaktu leh bank-te nena inthlunzawm an nih avangin  a pawimawh hle a, sawrkar hnathawh bik chauh tan ni lovin mipuite tana rawngbawltu tangkai tak a ni, a ti bawk. Sum pai enkawl a dik chuan sawrkar sum dinhmun a nghing ngai dawn lo a ni tiin, District Treasury Office Champhai chu changtlung zawka kalpui anih theihna tur leh mipui tana malsawmna ni turin duhsakna a hlan nghal a ni.

He hun hmanpuitu Dr. Z.R Thiamsanga, MLA, Vice Chairman, Health & Family Welfare Board chuan District Treasury Office thar hawn a ni chu Champhai district tana bung thar kaina a ni, a ti a. Dawrtu ngah tak an nih avangin thawktute  dawhthei taka awm turin a chah. Hawnna puala inkhawm tawi buatsaihah Covid-19 inkaihhruaina tha taka zawm a ni chu  fakawm a tih thu a sawi a.  District Treasury Office building hawn thar chu Champhai district tana  tangkai taka hman anih ngei a beisei thu sawiin duhsakna a hlan a ni.

District Bawrhsap Pi Maria C.T Zuali chuan sawrkar sumte a nih dan ang taka hman a tul thu sawiin,  sawrkar chu mipuite an nih angin an tana theihtawp chhuah tur kan ni, a ti a. Sawrkar sum anih ang tur nilo leh kalral turte venga enfiahtu tur Treasury Office Building changtlung tak sak a ni chu lawmawm a tih thu sawiin, thawktute chu ram rawngbawlna thinlung pu a uluk leh fimkhur taka thawk turin a chah a ni.

Hawnna hun hi Pu H.Vanlalhuma MFAS, Chief Controller of Accounts, Accounts & Treasuries chuan a kaihruai a. Pu R.Lalramliana MES, SDO, PWD Project Sub-Division, Champhai hnen atangin technical report ngaihthlak a ni a.  Pensioners Association Sub-Hqtrs. Champhai aiawhin Pu K.Lalrintluanga’n  thu a sawi bawk a. Pu Lalchhuanliana Sailo MFAS, Treasury Officer, Champhaiin lawmthu sawiin hun a khar a ni.

District Treasury Office hi RCC Building mizopa chhiara chhawng  hnih niin, square metre 407 a zau a thut a. October Ni 4, 2018 a sak tan niin, November Ni 14, 2019 khan zawh fel a ni a. Architecture Cell PWD leh Design Cell PWD te kutchhuak  a ni. Building hian Record Room, Compilation Room, Stage cum Hall, Garage, Treasury Officer Room, Server Room, Bill Section, Bill Counter, Pension Section leh Toilet Floor tinah 3 zel a kengtel a ni.

Treasury Office hi Champhaiah kum 1981 khan Sub Treasury Office ti a bul tan a ni a. Kum 2007 atang khan District Treasury Office-a hlankai niin CHANEM Building an luah thin a ni. Tun dinhmunah hian pensioners mi 1460 an hnuaiah an inziaklut mek a, DDO 65 vel hnuaia thawktu te’n  an ni kaltlang hian hlawh an la mek bawk a ni.