No.6943/2020-2021

Vawiin khan Social Welfare Minister Dr. K. Beichhua chuan Mission Foundation Movement (MFM)-in Sawrkar Laipui Ministry of Tribal Affairs, tanpuinaa Reiek RD Block huam chhunga  project an kalpui tan Start-up Entrepreneurship Development Programme hnuaia khaw 21 a beneficiaries 120 an thlanchhuah te hnenah bungraw leh khawl hrang hrang semna programme an buatsaih chu Reiek Community Hall ah a hmanpui.

Dr. K. Beichhua chuan Mission Foundation Movement te hnathawh leh thil tih chu fakawm a tih thu sawiin midangte tana malsawmna nih aia ropui a awm lo, a ti a. MFM te hma lakna hrang hrang te chu mipui tana thil tangkai leh tha nia a hriat thu sawiin midangte tana mawlsawmna ni zel turin duhsakna a hlan a. Khawl leh hmaraw dawngtu beneficiaries te chu mahni kut kawia eizawng entrepreneur hlawhtling ni tura fuihin mimal hlawhtlinna chu khawtlang hlawhtlinna a ni, khawtlang hlawhtlinna chu ram hlawhtlinna a ni, tiin tih tak zetna leh taimakna nen an eizawnna puihna tura an dawn te chu hmang tangkai turin a chah tel bawk a ni.   

Social Welfare Minister chuan Sawrkarin mimal anmahni kut kawi leh thiamna hmanga eizawng entrepreneurship chu a dah pawimawh thu sawiin hetiang mi taima thalai zinga an awm tan hi a lawmawm a, Sawrkar hna a innghat lova mahni kut ke ngei a intodelhte chu mi entawntlak leh mite ngaihsan an ni zel thin a ni, a ti. Hetiang mi taima te thawhrah hi a ropui a, an hnathawh leh hmalakna avangin ram hi a intodelh thei, a ti.

He hunah hian Pu K. Liantlinga, Vice Chairman Social Rehabilitation Board leh Pu C. Lalsawta IAS (Rtd.) Chairman Lokayukta te pawhin fuihna thu an sawi bawk a ni.

Programme hi Pu Ngurthansanga, BDO Reiek chuan kaihruaiin Pu Lalramchuanzela, Coordinator, MFM chuan Start Up Entrepreneurship Development Programme hnuaia an hmalak dante, beneficiaries an thlan dante leh an tum te a sawi.

Start Up Entrepreneurship Development Programme hi Ministry of Tribal Affairs tanpuina in MFM in Reiek RD Block huam chhunga an kalpui tan dawn a. Khaw 21 atangin beneficiaries 300 an thlanga, a thawh khatnaa mi 120 eizawnna hrang hrang kalpui mek te chu vawiin khan an eizawnna pui thei bungrua leh khawl te an hlan a. A thawh hnihnaa mi 180 an thlan te hnenah bungrua an pe leh dawn a. Beneficiary tin te khawl leh bungrua dawn te hi cheng Rs. 45,000/- man hu theuh niin trade hrang hrang – huan, dawr, restaurant, baking, furniture leh carpentry works, computer thil chhut leh print dawr leh puan thui te an ni. Vawiin khawl leh bungrua an sem te chu fridge, puanthui khawl hrang hrang, computer leh printer, oven, mixer, thing khawl hrang hrangte leh huan enkawlna bungrua leh khawl te a ni.

MFM hi NGO 2004 a din niin tunah hian project hrang hrang 20 an kalpui mek a ni.