No.3328/2020-2020  

Law & Judicial Minister Pu T.J. Lalnuntluanga chuan vawiin hian tunhnai lirnghing  avanga chhiatna hrang hrang tuar mek  East Tuipui bial chhung khaw hrang hrangte a fang chhunzawm zel a ni.  Minister leh amah tawiawmtu District Official leh khawtlang hruaitute hian vawiin hian Khuangthing, Zawlsei, Khawbung, Leithum leh Khuangleng khuate tlawhin Village Level Disaster Management Committee-te leh khawtlang hruaitute meeting neihpuiin chhawmdawlna thilpek an hlan a ni.

Pu T.J. Lalnuntluanga  chuan lirnghing tuarte tawrhpuia, an harsatnate a hmun ngeia kalchilha hriatpui tur leh hnem tura Khawbung RD Block tlawh an nih thu a sawi a. Upate thurochhiah pawimawh tak, tuarte tawrhpui tih changchawia lirnghing vanga chhiatna tuarte thlamuana, a theih ang chena chhawmdawlnate pek chu an tum bulpui ber a ni, a ti a. June Ni 22, 2020 a lirnghing vanga chhiatna thlengte hriat anih veleh East Tuipui leh Champhai South bialtu MLA te leh State sawrkarin a tul anga hma an lak vat thu sawiin, Chief Minister-in sawrkar laipuia hotu lu Prime Minister, Home Minister leh DONER Minister-te be pawp vatin thil chinchang a hrilhfiaha,  an ni pawhin a tul ang zela tanpui an inhuam thu an rawn hrilh a ni, a ti a. Lirnghingin a tihbuai biala  harsatnate buaipui kawngah bialtu MLA te'n theihtawp an chhuah mai bakah a hmun ngeiah ram hruaitu Minister leh MLA te'n an tlawh a, Sawrkar lam atangin district administration, leilung lam zirmi mithiam bikte, Health Department thawktute, DM&R Team, SDRF Team leh  Psychologist rualte an lo feh chhuah tawh thu sawiin, hei hian sawrkarin lirnghing tuar khuate a ngaihven zia a lantir a ni tiin, lirnghing tuarte hmakhua ngaia Health Minister leh DM&R Minister-te hmalakna chu fakawm a tih thu a sawi bawk.

Law & Judicial Minister chuan lirnghing vanga harsatna thlengte  District Adminstration-in a tul anga hma la vata, hmanrua leh mamawh tul dangte a buaipui nghal char char thin chu fakawm tiin, Official leh khawtlang inkara  thawhhona tha tak awm chu chhawmnung zel turin a chah a. Minister chuan  tul leh mamawh ang zelin district thuneitu leh State  sawrkarin theihtawp a chhuah zel dawn thu  sawiin, khuarel chhiatna thleng thinte  a tihreh theih loh nain a tul ang zela hmalak ngaihna zawnah sawrkar a inhawn reng thu a sawi a. Khaw hrang hrang te'n a enkawl department atanga  mamawh an thlente chu ngaihthlak sakin a tul anga bawhzui a tum thu a hrilh a. A mi leh sate harsatna hriaa Sawrkarin  rang taka buaipui ngaite a buaipui zel thu sawiin, nakin hun thlengin a tul leh buaipui ngaiah sawrkar a inhawn reng thu a sawi bawk.

Champhai SP Pu Rex Zarzoliana Vanchhawng pawhin thu sawiin, chhiatna thlen thulha chet la nghal mai thei tur State Disaster Response Force (SDRF) mi 10 te Dungtlang Police Station ah dah an nih thu sawiin, chhiatna thlen thulha chet lak dan tur zirtirna  khaw tinte tan a theih chen chena  kalpui thuai tum anih thu a sawi a. Ramri dep khuaa awmte chu dan kengkawhtute  tha taka tawiawm turin a sawm a ni.

Pu R. Lalnghakliana, Project Director, DRDA Champhai pawhin thu sawiin, lirnghing avanga harsatna hriat anih veleh District Disaster Management Authority chu hmanhmawh taka thukhawmin enfiah leh chhawmdawlna pek dan turte ngaihtuah nghal anih thu a sawi a. Sawrkarin theihtawp chhuahin a tihtur angte a tih zel dawn thu sawiin, harsatna awmahte district thuneitu hrilh hre nghal zel turin a chah a ni.

Law & Judicial Minister hian Village Level Disaster Management Committee-te hnenah tanpuina sumfai a hlan nghal zela, District Disaster Management Committee kaltlangin chhawmdawlna ei leh inte sem a ni bawk.

Khaw hrang hrang tlawhnaah hian khawtlang hruaitu kalkhawmte chuan lirnghing vanga buaia chiaite a hmun ngeia kalchilha tlawhtu Law & Judicial Minister, district official leh khawtlang hruaitute chungah lawmthu sawiin, an thlamuan pui hle thu an sawi a. Tun hun thlenga State sawrkar leh district hotute tawiawmna leh ngaihsaknaah lawmthu an sawi a ni.

Pu T.J. Lalnuntluanga hi Pu Rex Zarzoliana Vanchhawng SP, Pu R. Lalnghakliana, PD DRDA, Dr. Lallawmkima DIPRO, Er. J.Lalhmachhuana, EE, Power Project Division Champhai, Pu Benjamin Zalawma Ralte BDO Khawbung te leh khawtlang hruaitu te'n an tawiawm a ni.