Vawiin khan Champhai South bialtu MLA leh Law Minister nibawk Pu TJ Lalnuntluanga chuan a bial chhunga Veng hrang hrang 6 ah damlo mamawhte hman turin Oxygen Concentrator YMA hruaitute kutah a hlan, naktuk lamah veng 4 a pe leh ang.

Thusawiin Law Minister chuan Mihring te'n hriselna leh damna kan mamawh fo thin a, damna mamawh natna khuma mu mekte, dam lo mangang tanpui ngaite'n an hman theih turin Oxygen Concentrator chu tanpui ngaite tanpuitu YMA kutah ka hlan che u a ni, a ti. Bial mipui te mamawh angte a tul leh tahtawl ang zela ngaihtuah anih thu a sawi bawk.

Oxygen khawl hi MLA Fund kaltlanga pek a ni a, vawiinah khawpui huam chhung veng 6 ah semin naktukah khawpawn veng 4 ah a sem leh dawn a ni. Oxygen Concentrator hi Chhungte, Jail Veng, Electric Veng, Zion Veng, Tlangsam Mual Veng, Ruantlang ah te sem niin, naktuk lamah Melbuk, Zokhawthar, Kelkang Vengthar leh Dilkawn te sem a ni leh ang.