No.6690/2020-2021
Dated Champhai, the 27th November, 2020: Vawiin chawhnu khan Law & Judicial Minister Pu T.J. Lalnuntluanga chuan Mizorama SBI Branch 45-na ni turin SBI Bethel Branch, Champhai chu a mamawhtu apiangte tana hman theih turin ribbon chepchatin a hawng.
Hawnna puala inkhawm buatsaihah Khuallian Pu T.J. Lalnuntluanga chuan ram sum leh pai dinhmun tha leh hrisel tak nei tur chuan Banking System changtlung tak kan neih angai a ni tiin, hemi kawnga hmalakna pakhat atana Bank branch thar Champhaia hawn a ni chu rahbi thar pawimawh tak a ni, a ti a. Mipuite chu bank pawimawhna leh hman tangkaina hre zual zel tura a duh thu sawiin, sum renchema khawlna chang hre lova sum neih ang apiang khawhral duhna thinlung pu chu tlakranna mai a ni a, mahni thawhchhuah khawlna chang hriate chu mi dingchang turte an ni, a ti bawk.
Champhai South bialtu MLA ni bawk chuan midangte tana malsawmna ni turin loan lakte ngaipawimawha a hun taka rulh that angai a ni, a ti a. Ramri depa awm Champhai district tan banking system changtlung mamawhna a san thu sawiin, Bank hotute pawh tun aia nasa lehzuala tan la turin a chah a. Sawrkar laipui leh State-ten Scheme hrang hrang hnuaia tanpuinate sumfaia inpe tawh lovin Bank kaltlanga an pek zel tawh thu sawiin, hei hian mipuite sum vawnhim leh bank kalphung zir kawngah nasa takin a pui a ni, a ti a. A remchanna apiangah mipuite banphak Banking facilities chhawp chhuah a tul thu a sawi bawk.
Law & Judicial Minister chuan SBI ah hun engemawchen empanelled lawyer anga a lo awm ve tawh thin thu sawiin, SBI Branch thar Champhaia hawn anih theihna tura a lo beih thin tawh thu pawh tarlangin, vawiina a hlawhtlinna hmel hmuh a ni ta chu lawmawm a tih thu a sawi a, Bank branch dangte pawh hawn belh leh thei tura hmala turin SBI hotute a ngen a. Hah leh rim taka thawk thin Bank thawktute chu chinchang hre lo zawk te’n tlangnel taka Bank an dawr theihna tura dawhthei taka lo dawngsawng thiam thin turin a chah bawk. SBI Bethel Branch chu a dawrtu mipuite, Champhai khua leh ram pum ang pawha tangkai taka hman a nih theihna tura duhsakna hlan chungin a hawng a ni.
Minister tawiawmtu Er. H.Lalzirliana, MLA, Vice Chairman, Road & Infrastructure Development Board chuan a bial chhung khaw panga chawikanna tura SBI Foundation atanga tanpuina duan anih avangin lawmthu a sawi a. SBI Branch thar hawn anih theihna kawnga District Administration, SBI leh khawtlang hruaitute hmalakna fakawm a tih thu sawiin, International boundary a awm Champhai chuan Bank Branch thar hawn chu a hman tangkai ngei a a beisei thu a sawi bawk.
Khualzahawm Pi Maria C.T Zuali chuan Champhai District chhunga Bank Branch 15 na tur SBI Bethel Branch hawn a ni chu mellung pawimawh tak anih thu a sawi a. Financial inclusion hnuaiah mitinte tan Bank account hawng tura hmalak anih thu sawiin, sawrkarin tanpuina a pek sum leh paite pawh bank kaltlangin Direct Benefit Transfer (DBT) hmanga pek a nih avangin Bank-te pawimawhna a zual telh telh ani, a ti a. Bank-a sum dah luh leh lakchhuah CD Ratio inthlau lutuk chu veiawm a tih thu sawiin, hemi kawnga tanla lehzual turin Bankers te a hrilh tawh thu a sawi a. Bank kaltlanga hamthatna awm thei hrang hrangte chu line department leh Bank te’n mipuiteah zau zawka an hrihfiah angaih thu pawh sawiin, Bank hman dan inzirtirna Financial Literacy Camp pawh tun aia ngawrh lehzuala kalpui a tul thu a sawi lang bawk.
Kalkhawmte lawmna thu sawitu Pu LP Lalchangkima, Regional Manager chuan hun engemawchen kalta atang tawha Champhaia SBI Branch thar hawn belh tuma hmalak anih thu a sawi a. License tawp hma ngeia peihfel a ni chu lawmawm tiin, a hlawhtlin theihna tura district hotute leh khawtlang hruaitu leh tha thawhtu zawng zawngte chungah lawmthu a sawi a. Bank chu mipuite chhawr tur leh chawikanna tura din anih thu sawiin, lungawi lohna nei te chu hotute hnena thlen zel tur leh thawktute chu mihring ve tho an nih angin duhkhawplohna awmah pawh infinchhuah zel nise a duhawm hle ang, a ti bawk.
Pu Lalrindika Hrahsel, Deputy Manager (Premises) chuan report tawi a pe a. Champhai Bethel Branch SBI thar hi C.Rohmingliana Building, Bethel Veng a mi luah hawh niin, Square feet 2,284 a zau ni a. A hmunhma cheibawl leh hmanruate bunfel nan cheng nuai 50.09 sen a ni a. Thawktu mi 3 hmangin bul an tan dawn a ni.
He hunah hian Pu T.Thanga, Bethel VCP pawhin thu sawiin, Pu Thangkhanlian Tonsing, Branch Manager chuan lawmthu sawiin hun a khar a ni. Hawnna hun hman zawh hnu hian Minister hovin Bank hmunhma hrang hrangte tlawhkual a ni.
