No.6689/2020-2021

Lawngtlai, Sahmulphah thla ni 27, 2020: Lai Autonomous District Council (LADC) hnuaia Member of District Council (MDC) Inthlanpui, 2020-a hman tur Electronic Voting Machine (EVM) te chu vawiin khan Lawngtlai DC Conference Hall-ah hman theih tura buatsaih (commission) a ni.

He hunah hian LADC hnuaia constituency 25-a polling station 111-a EVM (control unit + ballot unit) hman tur leh reserve atana dah hran 32 chu engineer-te'n hman theih turin an buatsaih a. A khawl lam buatsaih fel vek a nih hnuah candidate-te hming chhut luh niin, a kal dik leh dik loh enfiah leh vek phawt a ni a. Vote thlak nana hman theih mai tura peih felfai a nih hnuah khawih danglam theih tawh loh tura seal hmanga uluk taka char niin, dah that nghal zel a ni.

EVM commission-naah hian District Election Officer Dr Andrew H. Vanlaldika leh official dangte bakah, political party ai awhte pawh an tel.