No.6688/2020-2021

Lawngtlai, Sahmulphah thla ni 27, 2020: Vawiin khan Lawngtlai District Level Task Force on COVID-19 (DLTF) chu Lawngtlai DC Conference Hall-ah thu khawmin, COVID-19 hri leng darh zau zel tur ven nana hma lak dan tur an ngaihtuah ho va, December ni 1 atanga ni 5 thleng Lawngtlai khawpui chhung bikah eng emaw chin inkhuahkhirh (partial lockdown) an rel.

He thut khawm hi DLTF Chairman Dr Andrew H. Vanlaldika'n kaihruaiin, COVID-19 hri leng laka him turin sawrkar leh VLTF-te'n tih tur chin nei mah se, mimal tin kan fimkhur a pawimawh ber a ni, a ti a. Hmai tuam that leh kut sil fai uar chuan hri kai palh theihna lakah nasa takin mi a veng thei tih hre thar leh tura Lawngtlai District mipuite chahin, vantlang zinga hri kai hmuh chhuah belh zel a nih vang te, Lai Autonomous District Council (LADC) Inthlanpui hmachhawn mai tur a nih vang leh Krismas leh Kumthar hunpui lo thleng tur te ngaihtuahin, mipuite fimkhur thiam a tul zual hle a ni, a ti.

Member Secretary, Lawngtlai Chief Medical Officer Dr LC Liana chuan November ni 20 leh ni 24 inkar (ni 5) chhung Lawngtlai khawpuia partial lockdown puan chuan hri leng darh zel tur venna kawngah awmzia a nei hle tih sawiin, hemi chhunga hri kai hmuh chhuah tharte pawh contact tracing tih ngai a tlahniam nasa hle tih a sawi a. Khawi laiah pawh hri chu lo awm se, a kai tur mihring an awm loh chuan amahin a thi mai a, mipui an chhuahvah tam loh phawt chuan hri darh theihna nasa takin a tlahniam tih sawiin, partial lockdown chu hri dona kawnga hmanraw tangkai tak a ni, a ti.

LADC Inthlanpui lo awm turah inthlan thil kal mek tam tak a awm avangin a kaihhnawih tel political party-te pawh he meeting-ah hian sawm tel an ni a. Political party ai awhte, Central YLA lam leh member dangte atanga thu sawi ngaihthlak a nih hnua member-te sawi hona atangin Lawngtlai District chhunga vantlang zinga hri inkai darh zel tur ven nan leh LADC MDC inthlan boruaka hri inkai darh palhna boruak awm thei ven nan tul lova mipui chet velna khuahkhirh a pawimawh tih a ni a. Hemi atan hian December ni 1, 2020 atanga December ni 5, 2020 thlengin Lawngtlai khawpui chhungah eng emaw chin inkhuahkhirh (partial lockdown) ni se, tih a ni.

Inkhuahkhirhna kalpui dan tur erawh chu Bawrhsapin hriattirna (notification) a la chhuah dawn a ni.