No.6687/2020-2021

       Vawiin khan Mizoram Samagra Shiksha-a thawkte dinhmun zir chiang tura din Study Group ten an report sorkarah an thehlut. Study Group te hian Mizoram Samagra Shiksha-a thawktute dinhmun leh harsatna an neih te uluk takin an thlirho a, kumin January thla atang khan vawi 5 an thukhawm a, vawiin chawhma khan School Education Minister Pu Lalchhandama Ralte Office chamber-ah hlanna hun buatsaihin  study Group Chairman Pu K.Sangthuama'n Minister hnenah  a hlan a ni.

      Pu Lalchhandama Ralte Minister chuan Study Group ten lehkha pawimawh chi hrang hrang nen an report an thehlut thei ta chu lawmawm a tih thu a sawi a. Report chu sorkarin a zir chiang ang a, rawtna atanga ke pen theih turte sorkarin a thlir dawn a, hrileng avangin study group report chu umzui chak a har deuh dawn tih erawh chu FEMSE pawhin lo hria se a duh tih a sawi. Minister chuan Mizoramin sorkar laipui atangin sum a dawng tha lova, Samagra Shiksha hnuaia thawkte hlawh pawh Central-in a rawn pek that theih loh thu sawiin hrehawm a tih thu a sawi a, Mizoram chauh ni lovin India ram pumin harsatna a tawh avangin hnathawh a harsat rih thu a sawi bawk.

        Study Group report-a a lan danin Samagra Shiksha-ah hian SSA teacher 2326 leh RMSA teacher 517 an vaiin 2843 an awm a, sorkar enkawl school-a zirtirtu awm zawng zawng atanga chhutin Samagra Shiksha-a thawkte hi zaa 19.2 an tling.

        Federation of Mizoram Samagra Employees (FEMSE) chuan an hlawh leh dinhmun siamthat phutin  nikum kum tawp lam khan mass casual leave an la a, sorkar nena an inbiaknaah an lungawi lohna te, an hlawh leh service dinhmunte enchiang turin study group din nise tih remtih a ni a. Ni 20.12.2019 khan Mizoram sorkarin Study Group a din ta a. Chairman- Pu K.Sangthuama Joint Secretary School Education  Department; Vice Chairman Pu C.Lalhuliana Joint Secretary School Education Department (a ni hi 1.3.2020 khan a retired); Member Secretary Pu C.Lalthanzira Addl State Project Director, Samagra Shiksha. Member-te – Pu Rosangzuala Ralte, President MTF leh Pu R.Lalnunhlima President FEMSE te an ni.