No.6686/2020-2021

    Vawiin chawhnu khan School Education Minister Pu Lalchhandama Ralte hovin a office chamber-ah School Education Department hotuten School hawn dan tur te, Syllabus chungchangte leh Examination kalpui dan turte an sawiho.

     Minister hova meeting-ah hian thlasikah hrileng a zual hlauhthawnna a awm avangin kumin 2020 chhung chu School hawn tawh rih loh nise tih an rel. School luh hun atan  January  15, 2021-ah  tinzawn a ni a, School luh theih hun tur hi State Executive Committee-ah la thlir zui leh a ni dawn a ni. December 18,2020 thleng leh January 5-14, 2021 chhung chu online class chhunzawm zel nise tih an rel bawk.

      Hostel-a awm mek naupangte chu December 11,2020 ral hmain hostel atanga  chhuahtir vek ni se, hostela luh leh hun tur chu hostel neituten sorkar thuchhuak lo ngaichang se, an ti bawk.

   School kal theih loh avang hian Syllabus hman mek chu India rampuma kalpui angin zaa 30 a tihtlem a ni a, zirtirtute pawh zirlai paih then tur leh an zir tur chin hriattir an ni tawh niin MBSE hotuten an sawi a, Board Exam turte an inbuatsaih thiam theih nan CBSE pawhin a lo tih angin Model sample question MBSE ten siam se, tih an rel a. Board Exam hun atan April 2021 an ruat bawk.

    Class I-VIII te tan Bridge course buatsaih ni se, class I-VIII chu SCERT in siam se, class IX leh XI te exam dan tur chu MBSE ten lo ruahman se,  naupangin an thiam ngei ngei tur a pawimawh zualte hmaih lo tura inruahman ni se, an ti bawk.

     Vawiin meeting-ah hian Minister bakah HRD Board Vice Chairman Pu Lalthangmawia, Commissioner & Secretary Pi Esther Lalruatkimi te, MBSE, SCERT hotute leh Department Officer pawimawhte an tel a ni.