71/2023-2024

Dated Serchhip, the 11th April, 2023: Vawiin khan Pu T.J Lalnuntluanga, Minister, Transports, Law & Judicial, etc., chuan SEDP sum Rs. 240 lakh senga sak Serchhip Darnam Venga District Transport Office building thar a hawng.

A hawnna inkhawm Office thar tuala buatsaihah Minister chuan, Serchhip DTO Building thar hawn a ni ta chu lawmawm a tih thu sawiin Serchhip district tan hmasawnna hmel thar duhawm tak a ni, a ti. Tunhma chuan Aizawlah kan lirtheite register turin kan kal thin a. Hun engemawchen atang khan Serchhip in DTO kan nei ta a, mipuiten kan awlsam phahin kan tangkaipui em em a, vawiinah phei chuan a hmunhma pawh changtlung lehzual, lirthei tam tham tak dah theihna kan nei leh ta a ni. A hmunhma min petu Darnam khawtlangte chungah lawmthu kan sawi a, a sak chhunga Darnam VC ten min puih nasatziate kan hrereng a, kan lawm hle a ni. A satu contractor te pawhin an thawk tha hle niin ka hria a ni, a ti. Ram economy hi transport sector-ah a innghat thuk em em a, chuvang chuan sawrkar pawhin nasa takin a thuam tha chho zel a, hmalakna engemawzat kan kalpui mek a ni. Hma sawnna lo awm zel vangin lirtheite kan hmang uarin a nei thei pawh kan tam chho deuh deuh va, lirtheia himna hi kan ngaih pawimawh deuh deuh a tul hle a, kumtina India rama lirthei chetsualna leh chumi avanga chhiatna leh hloh kan neih ti a tam tham hle a ni. Lirthei neitute leh khalh thinten dan ang taka kan lirtheite kan enkawl a pawimawh a, dan hian kan himna tur min pein min kawhhmuh tih hrereng ang u. Himna lama hma kan sawn zel theih nan Road Safety Week kan tih thin kha Road Safety Month tiin kan kalpui tan a, heng hun pawimawh kan hman te pawh hi dan bawhchhetute man leh hremna hun atana chauhva hmang tawh lovin; dan an zawm theih nana lirthei neitute tanpuina hunah kan hmang chho tawh zawk a ni, a ti. Serchhip DTO Thawktute pawhin dan ang taka hna an thawha, mipuite tanpuitu an nih ang ngei a an tihturte tha taka ti zel a beisei thu a tarlang a ni. Pu T.J Lalnuntluanga chuan, kan ramah social media velah sawisel thiam kan tamin siam thatu leh tihdan dik kawhhmuh theitu erawh kan tlem hle nia a hriat thu sawiin, mi tinten thil tha leh tangkai ngaihvena, ngaihhlut tur dik kan ngaihhlut thiam zel a tul nia a hriat thu a tarlang bawk.

District Transport Office Building thar hawnna inkhawm hi Pu K.T Beicho, IRAS, Principal Secretary, Transport Department chuan a kaihruai a, Lt. Vanlaltharzuala, CO in hunserh hmangin Er. R. Lalrammawia, Director, Transport Department chuan Building thar sak dan report a pe a ni. Building thar hi chhawng thum niin, kawng an hnuaiah lirthei dahna tur floor a awm a, kawng an leh chumi chung chiah floor chu pisa atan hman a ni. SEDP sum Rs. 240 lakh senga sak niin a satute hi CB Engineering an ni.

Serchhip District Transport Office hi hun rei tak chhung chu New Serchhip IOC Vengah a awm thin a, vawiina hawn tak Building thar hi Serchhip Darnam Vengah sak a ni thung. Thawktute pawh he Building tharah hian insuan lut fel tawhin anmahni dawr duhte chuan building tharah hian pan tawh tur an ni ang.

Building thar hawnna inkhawm hi Pu C. Lalawmpuia, DTO, Serchhip chuan lawmthu sawiin a khar a ni.