72/2023-2024

Lunglei the 11th April, 2023 - Lunglei DC Office leh Bureau of Indian Standards, Guwahati te tangkawp buatsaihin vawiin khan Convention Centre, Lungleiah Bureau of Indian Standards (BIS) chungchangah Awareness program neih a ni. He program ah hian Lunglei District huamchhunga Head of Office-te, NGO-te, MJA, Lunglei District Consumer Association-te, Southern Market Association, Lunglei Market Association, Zirlai Pawlte, Lunglei Government College leh Government J Buana College-a Consumer Club member-te an tel a ni.

Awareness program hmanpuitu Lunglei Deputy Commissioner Pi Ramdinliani chuan Bureau of Indian Standards chungchanga Awareness Program chu khua leh tui te consumer kan nih anga kan dikna chanvo te leh Dan ina a beisei anga thil siamchhuah ngei te kan hriat hrana, kan lei theihnan inzirtirna buatsaih anih thu a sawi a. Mihring hriselna leh nunna nghawng thei thil siamchhuah ah te Mandatory Certification tih ngei Dan in a phut thu sawiin khua leh tui te, a bik takin sawrkar department te phei chuan heng certificate nei te chauh lei thin turin a chah a. Kalkhawmte chu awareness program tangkai taka hmang tur leh BIS Care Application tangkaina te pawh an hnathawhna, an chhungte leh an thiante lo zirtir turin a chah a ni.

Vawiin awareness program-ah hian Bureau of Indian Standards Guwahati Branch Office atangin Shri Jishnu Das,SPO leh Shri Shivam Aggarwal, Scientist B te resource person an ni a. Bureau of Indian Standards hnathawh hrang hrang, Certification kalpui dan leh License chi hrang hrang, Mandatory Certification ngai te, BIS Care Application hman tangkai dan te zirho a ni a. Zawhna leh chhanna hun tha tak hman zui a ni bawk.

Bureau of Indian Standards hnuaiah hian India ram chhunga thil siamchhuah chi hrang hrang 381 te chu Compulsory Certification of BIS (ISI Mark) nei ngei tura tih te an ni a. Heng zingah hian naupang infiamna (toys), helmet, pressure cooker leh gas stove te a tel a. HSD Bar (Rod) te pawh calibrated weighing scale nena hralh chhuah tur niin BIS standard IS 1786 ina size tur a bituk anga siam tur a ni. ISI nei tura tih neilo emaw ISI lem hmanga siam leh zawrh chu Dan in a khap a. Resource person-te chuan ISI nei tur neilo emaw, ISI lem hmanga sumdawng an la tam thu sawiin consumer te pawh kan aware a pawimawh hle a, BIS Care Application kaltlangin mahniin thil tam tak an finfiah theih a ni tiin he Application hi khua leh tui mitinten lo hmang tangkai ve turin an chah bawk a ni.