1115//2023-2024

Aizawl, the 12th July, 2023: Mizoram Sawrkara Environment, Forest & Climate Change changtu Minister Pu T.J. Lalnuntluanga chuan vawiin khan Union Minister of Environment, Forest & Climate Change Pu Bhupender Yadav chu a Office Chamber-ah hmuin Mizoram mamawh hrang hrang a sawipui.

Pu T.J. Lalnuntluanga chuan Union Minister Pu Bhupender Yadav hnenah hian Forest Department hnuaia fund pending hrang hrang; Wildlife Protection Squad hlawh, CSS-Integrated Development of Wildlife Habitat (IDWH) hnuaia thawktute hlawh bakah department kaltlanga hmasawnna ruhrel thawh hrang hrang, Project Tiger hnuaia fund pek tawh loh chungchang leh Satellite Wildlife Rescue Centre, Champhai Tlangsama dinna tur approval awm vek tawh fund la sanction lohte sanction thuai a nih theih nana hmalakpui turtein a ngen a. Hemi bakah hian Forest Department-in hmasawnna an neih theihna tur kawng awm thei hrang hrangte a sawipui bawk a ni.

Mizoram mamawh Minister Pu T.J. Lalnuntluanga thlen hrang hrangte hi Union Minister chuan hmalak nghal a nih tur thu a lo hrilh nghal a. Wildlife Sanctuary leh National Park pahnih, Murlen National Park leh Phawngpui National Park-a thawktute hlawh nikum atanga tang tawh chu chinfel thuai a nih theih nan sanction order a siam tir nghal a. Hemi bakah hian heng National Wildlife Park pahnih chhunga wildlife habitat siamna tur leh developmental work thawhna tur hrang hrangte pawh sanction tel a ni bawk a ni.

Champhai Tlangsam-a Satellite Wildlife Rescue Centre dinna tur approval awm tawh chu financial sanction a nih theih nan Technical Committee-in August thla chawlkar hmasa berah an ngaihtuah nghal tur thu a lo hrilh bawk a. Forest Department-in wildlife crime hrang hrang do nana Wildlife Protection Squad dinna tura proposal a thehluh an pawm nghal thu a lo hrilh bawk a, hei bakah hian khawpui hmun hrang hrang 14 (sawmpali) a khawpui ngaw humhalhna tur project siam pawh pawm nghal a nih thu a lo hrilh a ni.

EF&CC Minister hian Pu Bivash Ranjan, Addl. Director General of Forests (Wildlife), Ministry of EF&CC, Govt. of India pawh a Office-ah tlawh nghalin a kawm a. Mizoram mamawh hrang hrang a thlente chu an lo bawhzui nghal tur thu a lo hrilh a ni.