1116//2023-2024

2023 Vawkhniahzawn thla ni 12: Pradhan Mantri Jan Vikas Karyakram (PMJVK) aṭanga Lawngtlai Vengpui YLA Khelmual tihchangtlun leh phullem (synthetic turf) phah chu vawiin khan Sports & Youth Services Minister Pu Robert Romawia Royte chuan inkhelh nana hman theih turin a hawng a. MSSC Lai Cup 2023 (Inter-Branch YLA Football & Volleyball Tournament) buatsaih tur chu a hawng nghal bawk.

Lawngtlai Vengpui YLA Khelmuala phullem phah thar hawnna inkhawm buatsaihah Sports & Youth Services Minister Pu Robert Romawia Royte chu Khuallian niin, Pu Lawmawma Tochhawng, MLA & Vice Chairman, Lunglei High Powered Committee leh Dr K. Pachhunga, MLA & Vice Chairman, Bamboo Development Board te chu Khual zahawm an ni a. Mizoram Legislative Assembly Deputy Speaker Pu H. Biakzaua, (MLA, Lawngtlai East) leh Lai Autonomous District Council (LADC) Chief Executive Member (CEM) Pu V. Zirsanga te chu a thlengtu (host leh co-host) an ni.

Pu Robert Romawia Royte chuan Lawngtlai District-in infiamna kawnga hma a sawn theih nan sawrkarin hma lakna tam tak a kalpui mek a, a hlawhtlinna pawh hmuh chhoh zel a ni tih a sawi a. Tun sawrkarah Mizorama sport infrastructure tihchangtlun nan State Budget piah lamah sawrkar laipui leh agency hrang hrang aṭangin hmasawnna hna thawhna tur sum ṭhahnem tak hmuh a ni leh chumi kal tlanga hna thawh a ni chu thil lawmawm leh chhinchhiah tlak tak a nih thu a sawi a. Mizoram Under-17 Inter-District Football Tournament, 2023-ah Lawngtlai District Football Association Team an champion chu chhuanawm a tih thu leh a lawmpui thu sawiin, phullem phah khelmual thar chuan District chhunga infiam mite tan hmasawnna tam zawk a thlen zel a beisei thu a sawi a. Sawrkarin ṭhalaite leh infiam mite ngai pawimawha a hma lakna chuan rah ṭha zawk a chhuah theih nan ṭhalaite chu theih tawp chhuah zel tur leh ruihhlo laka inthiar fihlim tlat turin a chah a. MSSC Lai Cup khelh tura tel turte chu infiam mi rilru zau tak pu tur leh thianghlim leh dik tak, ṭang tak si-a khel tura chahin, duhsakna a hlan a. Khelmual phullem phah hawn thar tak chu Lawngtlai District mipuite tan malsawmna a nih a beisei thu sawiin, duhsakna a hlan bawk.

Deputy Speaker Pu H. Biakzaua chuan Lawngtlai Vengpui YLA Khelmual tihchangtlun hawn theih a ni ta chu Lawngtlai District tan mellung pawimawh tak leh ni chhinchhiah tlak tak a nih thu sawiin, sport lamah sang tak thleng thei turin infrastructure ṭha mamawh a ni a, chumi mamawh phuhruk tura sawrkarin Lawngtlai District chhunga hma lakna pawimawh tak tak a nei chu lawmawm a tih thu a sawi a. Sawrkar hma lakna kal tlangin District-a infiam mite leh ṭhalaite'n level sang zawk an thlen zel a beisei thu sawiin, infiam mite chu duhsakna a hlan a ni.

LADC CEM Pu V. Zirsanga chuan inlawmna thu sawiin, sawrkar thuneitute'n Lawngtlai District-ah ram tana ro tling infrastructure an siam avangin lawm thu a sawi a. A enkawl zui kawngah uluk leh fimkhur taka enkawl turin District mipuite chu a chah a. Pu Robert Romawia Royte chu District Council & Minority Affairs changtu a nih angin, District Council kal tlanga ram leh hnam chawi kanna kawngah theih tawp chhuahpui turin a ngen nghal a ni.

He huna khual zahawm Pu Lawmawma Tochhawng chuan Lawngtlai District-in sport infrastructure-ah hmasawnna tam tak a nei chu a lawmpui thu sawiin, duhsakna a hlan a. A hlawhtlin lehzualna tur chu Lawngtlai District aṭanga state, national leh international level thlenga hlawhtling tura invawrh chhuak an awm sup supnaah a ni ang, a ti.

He huna khual zahawm dang Dr K. Pachhunga chuan Lawngtlai District-in kawng hrang hranga hmasawnna a neih belh zel chu a lawmpui thu a sawi a. Lawngtlai Vengpui YLA Khelmual tihchangtlun chu mipuite'n ṭangkai taka hmang a, ruihhlo laka fihlim nan leh hrisel nan, infiamna kawnga hmasawn zel nan hmang turin duhsakna a hlan a ni.

Khelmual tihchangtlun leh phullem phah thar hawnna hunah hian Rev. Lalropeka Chinzah, LIKBK Central Ṭhalai Pawl chuan hunserh a hmang a. Mizoram State Sports Council (MSSC) Secretary Pu John Ṭanpuia chuan khelmual tihchangtlun hna chungchang technical report pein, MSSC Lai Cup 2023 Organising Committee Secretary Pu C. Lalhmachhuana'n MSSC Lai Cup technical report a pe a. CYLA Vice President Pu F. Lalrothanga leh YLA Vengpui Branch Secretary Pu V. Lalengvara te pawhin thu sawiin, LADC-a Executive Member i/c Sports Pu C. Hrangṭhianga chuan lawm thu a sawi bawk.

Vawiina phullem phah hawnnaah hian zaithiam zai ngaihthlak niin, YLA Council Veng Cultural Troupe te chuan hnam lam an entir a. Mizoram Dance Sport Championship-a gold medalist C. Lalruatdiki, jump roper chuan special item a entir a. YLA Golden Jubilee logo tlangzarhna hun hman ni bawkin, football tournament-a branch tel turte hnenah Sports Minister chuan jersey set khat ṭheuh a hlan a. Hemi hnu hian Minister team leh CEM team te'n phullem thar lawm nan penalty shootout an nei nghal a ni.

Vawiina Lawngtlai Vengpui YLA Khelmual tihchangtlun hawnna leh MSSC Lai Cup 2023 hawnnaah hian LADC Chairman Pu VL Hmuaka leh LADC-a Executive Member, Office Holder leh MDC-te, MSSC leh Lawngtlaia state leh LADC official-te, CYLA leh tlawmngai pawl dang hruaitute leh YLA member-te, political party hruaitute, Lawngtlai Vengpui khawtlang hruaitute leh mipuite leh zirlaite an tel a ni.

Lawngtlai Vengpui YLA Khelmual tihchangtlunna tur leh phullem phahna tur atan hian Ministry of Minority Affairs hnuaia PMJVK Scheme 2020-2021 aṭangin ₹ nuai 1,005.34 dawn a ni a. A hna hi M/S Decor India, GS Road, Guwahati te'n thawkin, a project chhungah hian synthetic football turf phah te, pavilion sak te, RCC gallery sak te, fencing leh hna tenau dangte a tel a ni.

Synthetic turf phah zau zawng hi a dung metre 106 leh a vang metre 70 niin, play area hi a dung metre 100 leh a vang metre 66-a zau a ni a. A synthetic football turf phah hi ACT Global Company, USA te siam a ni. Security fencing metre 2.20-a sanga hung kual a ni a. Pavilion 18 x 4.5 metre-a zau chhawng hnih sak tel niin, ground floor-ah hian player dressing room pahnih leh toilet pahnih dah a ni a. First floor hi official pavilion atan ruahman niin, mi 100 vel leng thei tura ngaih a ni a. RCC Gallery 34 x 4.3 metre-a zau block 2, chhawng hnih ve ve sak a ni bawk a. Ground floor hi canteen, store room leh a ṭul danga hman theih tura ruahman niin, gallery pakhatah hian mi 150 vel leng thei tura ruahman a ni.

MSSC Lai Cup 2023-ah hian inter-branch YLA football & volleyball tournament buatsaih niin, football-ah hian branch 40 leh volleyball-ah branch 11 an tel a. Main sponsor hi Mizoram State Sports Council niin, Central YLA-in Lai Cup hi an huaihawt a ni.