Vawiin chawhnu khan Champhai District Karate Associatiomn (CDKA) kum 18 tlin lawmna leh Mat thar lawmna hun chu Tourist Lodge Conference Hall, Champhaiah neih a ni a.  He hunah hian Champhai North MLA Pu TT Zothansanga chu khuallian niin, Pu Lalthiamsanga Sailo, Champhai SP chu khualzahawm a ni.

Khuallian chuan Champhai District Karate Association ten kum 18 na hmel an hmu thei chu thinlung taka a lawmpui thu a sawi a. Karate leh Combat games dangte chu Mizote rilrem zawng tak leh theihna tak tak phochhuahna, dan chhunga huaisenna leh tik tak takna hmanga insualna a ni, a ti a. Infiamna huanga inelnaah reng reng tunhmaa Champhai District lo ropui thin tawhna chu nei let leh tura tharthawh a tul thu sawiin, naupang beiseiawm tak leh hruaitu ngaihna hria, viak tha tak takte hnuaiah beiseina sang tak a awm thu a sawi a.

Lehkhazir chauh chu eizawnna puitling a nih loh thu leh infiamna hmang pawhin ei a zawn theih tawh a, inthununna, huaisenna leh taihmakna neih phawt chuan kawng a eng viau a ni, a ti a.   
Tunlai chhanah Khawvel hmaa ram leh hnam phochhuahna kawng pawimawh tak chu infiamna huanga inelna hi a ni, a ti a. Infiammi naupangte chu ruihhlo kaihhnawih leh thil thalo laka fihlim tur leh nun dan hrisel zwm thin turin a chahin, eizawnna tling khawpa in dinchhuah chuan State leh ram pum mawina a ni, a ti a. Karate Zirlai kalkhawmte chu an kalzelna turah duhsakna a hlan nghal a ni.

Khualzahawm Champhai SP Pu Lalthiamsanga Sailo pawhin thu sawiin Champhai leh Karate infiamna chu tunhma atanga sawizawm fo thin a ni, a ti a. Karate chu infiamna mai piah lamah nun dan tha zirna a ni tiin, insumtheihna chu a kentel thil pawimawh tak anih thu a sawi a. Police Department lam nena thawkduna Self Defence Class-te pawh neih nise tha a tih thu a sawi bawk a ni.

He hun hi Pu Lucus Thangmangliana, President, CDKA chuan kaihruaiin Pu TT Zothansanga hmalaknaa naupangte inzirna tur phah dup nuam tak Mat thar pek aan ni chu lawmawm a tih thu a sawi a. Naupangte chu nu leh pa, hotute leh upate thuawiha inchhungah phaktawka tangkai tum theuh tura an zirtir thin thu a sawi a. Eizawnna mumal leh mahni invenhimna thiam thei tura tanpui an ni, a ti bawk. Pu Sensei Lenghmingthanga, Chief Instructor-in report tawi a pe a. Sub-Hqtrs. YMA, MHIP, MZP leh DSYO lama hotuten thu sawina huna an nei a, lawmpuina thilpek an hlan nghal bawk a ni. Programme zawh hnu hian CDKA hnuaia Zirlai ten Demonsration leh lam mawi tak tak an entir a. Tlai lamah lawmna chawhlui kilho a ni. 

Champahi District Karate Association (CDKA) hi March Ni 15, 2000 a din a ni a. International level-ah Bronze medal 2; National Level-ah Gold medal 24, Silver medal 13 leh Bronze medal 16 bakah State level-ah medal 700 chuang an la tawh a. An hnuai atanga zirchhuak mi 27 laite chuan eizawnna puitling an nei tawh a, tuna zirlaiah pawh hian beiseiawm tak tak an awm mek a ni.