“MYC Online Coaching-a kalte zinga mi 200 hnenah Alternative Learning System (ALS)-in Scholarship a pe dawn.”-MYC Chairman Pu Joseph Lalhimpuia

Mizoram Youth Commission (MYC) leh IAS Coaching Institution Alternative Learning System (ALS), Delhi chuan Mizoram thalai mi 180 tan IAS Online Coaching leh HSSLC (Science) zirlai mi 400 tan IIT-JEE/NEET Online Coaching kalpuina turin inremna mumal tak an ziak fel.

MYC Chairman Pu Joseph Lalhimpuia leh Pu Prateek Bhattacharya, National Sales Head, ALS Satellite Education Pvt. Ltd., Delhi ten May Ni 31, 2018 khan MYC Office, Aizawlah inremna hi hming an ziak hnan ve ve a, hei hi UPSC Civil Service Examination leh Engineer & Medical Entrance Test a Mizoram thalai leh zirlaite tan dam khawchhuahna tling tur a nih ngei MYC Chairman chuan a beisei thu a sawi a. MYC Online Coaching kalpuina tur satellite khawl VSAT (Very Small Aperture Terminal) pawh MYC mamawh tur ang ALS-in an rawn bun sak nghal dawn thu te,VSAT khawl pakhatin Classroom pahnih zel chawm thei tur MYC-in an chah tih Pu Joseph Lalhimpuia chuan a sawi a.  July 2018 thla tir lama Online Coaching Class hawng tura chak taka an inbuatsaih thu te, Scholarship Examination pawh buatsaih thuai turin Delhi atanga ALS Team an chah nghal tur thu a sawi a. Mizoram thalai leh zirlaite chu hemi atana lo inbuatsaih nghal a, Tribal quota nen lo pawha IAS tlin theihna tur te, Mizoram quota piah lama Engineering/Medical College tha changpha tur leh IIT Institution tha ber berah pawh lut thei turin coaching mumal leh tha tak sawrkarin a chhawpchhuah tur hi tihtak takna nen luhchilh turin Mizoram thalai leh zirlaite a sawm a ni.

Pu Prateek Bhattacharya, National Sales Head, ALS Satellite Education Pvt. Ltd., Delhi pawhin ALS leh MYC inremna thuthlung sawifiahin, Mizoram Youth Commission chuan India rama IAS Coaching Institute lian ber pawl nen inremna thuthlung a ziahpui a ni tih sawiin, ALS chuan India ram pumah IAS Rank No. 1 vawi 3 a lo hauh tawh thute, kum 2017 IAS Exam result kumin 2018-a tihchhuahah IAS 244 an neih thu leh kum 5 chhung - kum 2013-2018 hian IAS 990 an hlawhtlinpui thute a sawi a. Pu Prateek chuan “He kan inremna thuthlung hi ALS-in kan ngaihpawimawh zia lantirnan Corporate Social Responsibility (CSR) atangin ALS chuan MYC Online Coaching zawmtute zinga mi 200 tan Scholarship Rs. 33.04 lakh kan phalsak nghal a,  Civil Service hnaa luh tum IAS Coaching zawm tur Scholarship Examination-a top 100 tan Rs. 24.78 lakh leh Engineer leh Doctor nih tum IIT-JEE/NEET Coaching-a kalturte Scholarship Examination-a top 100  tan Rs. 8.26 lakh kan sanction nghal a, hei hi zirlaiten Coaching fee an chawi tur phuhrukna, ALS-in fee a tumsak tur tihna a ni a, zirlaite kutah sum a lut lo thung ang,” a ti bawk.

 Scholarship dawng turte bakah hian MYC Online Coaching-ah hian IAS atan mi 80 leh IIT-JEE/NEET-ah zirlai 300 tan MYC chuan fee concession a siamsak dawn a, Scholarship hmu pha ho tan pawh an scholarship hmuh theih zat milin tanpuina leh lawmpuina ruahman sak an ni dawn a ni. MYC hnuaia IAS Online Coaching hi Northern Mizoram Zone Centre, Aizawl ah leh Southern Mizoram Zone Centre, Lunglei ah hawn tur a ni a, IIT-JEE/NEET Coaching pawh School Education Department hotuten Higher Secondary School-a Coaching Centre an ruahman sak theihna hmuna kalpui tum a ni bawk.