Zan khat riaka Tlabung tlawha zin Lunglei district bawrhsap Pi Ankita Chakravarty, IAS  chu zirtawpni (June 1, 2018) chhun khan Tlabunga tourist lodge-ah Tlabung Progressive Society bul tumin ropui taka lo hmuah a ni a; amah hmuaktu Tlabung mipuiten, Pi Ankita Chakravarty hi a thutna tura siam thutthleng cheimawi, Mizo puancheia khuh chungah thuttirin an lo zâwn a ni. 

Hemi hnu-a tourist lodge-a amah hmuaktute nen an inkawmkhawmnaah, Lunglei district bawrhsap hnenah hian khawtlang hruaitu leh mipuiten an mamawh chi hrang hrang an lo thlen a; kawlphetha mumal loh vanga harsatna an tawh thin chungchang te, hriselna lama thawktu indaih loh vanga harsatna an tawh te, an tui tlan chungchanga harsatna an tawh te bakah, khawtlang mamawh chi hrang hrang an lo thlen a ni.

Nimin (Zirtawpni) vek khan Lunglei DC-hoin, Tlabung SDO (C) chamber-ah ramri hung hna thawhin a kaihhnawih rèl ngai chi hrang hrang huamzau taka sawiho a ni a; ramri hung a nih avanga a bulhnaia miten buh leh thlai chinna hmun an chân chungchang te, border fenching enkawl zui zel dan tur te bakah, tun thlenga ramri hung pawna la awmte harsatna chinfel dan tur te, Corporate Social Responsibility chungchangte ngaihtuah a ni. 

Ramri hung a nih vanga mipuiten harsatna an tawh te chu sutkian a nih theihna tura hma la tur leh, June thla ral hma ngeia thil tul leh bawhzui ngai te zo fel vek turin, Pi Ankita Chakravarty chuan a kaihhnawih department leh public sector hotute a ngen a, an mawhphurhna hlen tura an hna an thawhna kawngah mipuite leh khawtlang hruaitute nen inlaichinna tha zawk siam tum tur te, inpekna thuk zawk nen ram tana an hnathawh chhunzawm zel turin a chah a ni.

Nimina Lunglei Bawrhsap-hoa thutkhawmnaah hian, India leh Bangladesh inrina hung páwna la awm, zangnadawmna hmu tawhte chu hung chhung lama an insawn dan tur sawiho a ni a; zangnadawmna hmuh tawh hnu-a hung pawna la awm lui zelte chu a tul dan azirin tihluihnaa nawr chhuah (forceful eviction) mai an ngaih tur thu pawh sawilan a ni.

Lunglei DC Pi Ankita Chakravarty hian tukin khan Tlabung chhehvela India leh Bangladesh inrina hungna hmun tlawhin, mipuite dinhmun a hmunah a enfiah a, vawiin khan Tlabung chhuahsanin Lunglei lam a pan lehnghal a ni.