Chief Minister Pu Lal Thanhawla chuan vawiin khan Bible Society of India (BSI) Bible House sakna tur lungphum a phum. Bible House hi MG Road, BSNL Office thlangah sak tur a ni. Lungphum phumna inkhawmah hian Home Minister Pu R. Lalzirliana leh UD&PA Minister Pu Zodintluanga te an tel bawk a ni.

Chief Minister Pu Lal Thanhawla chuan nikuma lei chet avanga Bible House leh a bul building te chhuahsan a inthiarchhuah a ngai chu pawi a tih thu sawiin, sawrkar pawhin BSI hotute nen inbe pawp a an awm zel dan tur ngaihtuah sakin, tuna hmun thar chu ruahman a nih tak dan a sawi a. Chumi atana Home Minister, Finance Minister, UD&PA Minister leh Revenue Minister hmalakna chungah pawh lawmthu a sawi a ni. Chief Minister chuan Mizoramin Chanchin Tha hril a thlah loh chhung chuan hnam chimral in a awm theih a rinloh thu a sawi a. Ringtuten ringtu an nihna an nitin nunah an lanchhuah tir pawimawh a tih thu a sawi. Mizote chu hnam pumpui ang zawngin vanneihna nasa tak an chang nia a hriat thu CM Pu Lal Thanhawla chuan sawiin, khawvela sakhua lian ber berte hual beh a awm, thenawm tlangram state dangte aia Chanchin Tha dawng hnuhnung ber a nih bakah tlangram chhengchhe taka cheng anga ngaih theih ni mahse kawng hrang hrangah hma a sawn zel thu a sawi a. Chutichung chuan rawngbawlna leh Chanchin Tha hril kawngah te hma a sawn in, sawrkar hmalakna ang zawng pawha mi harsa leh chanhaite dawmkang tura hmalakna hrang hrang avangin tun hnaiah Mizoram economy in hma a sawn chhoh thu te a sawi a. Heng hmasawnnate hi sawrkar leh mipui thawhhona rah a nih avangin ram hmasawnna atan tangrual tlang zela, ram leh hnam tana mahni zawn theuhvah rinawm taka thawk tlang turin mipui a sawm a ni.

Tuna Bible House sakna tur hi a hmun hlui nen Sawrkar nen inthleng in, a sakna tur hi UD&PA Department kaltlangin sawrkarin Rs. 4.7 crores a tum sak dawn  a. Ruahman dan chuan Bible House tharah hian chhawng riat awm tura tih niin, Office Room hrang hrang bakah Committee Room, Retail Outlet, Warehouse, Packing Room, Archive leh Staff Quarter bakah mi 310 len theihna Auditorium the, Choir Room leh lirthei dah nan floor hnih ruahman a ni.

Bible House lungphum phumna inkhawm hi Rev. Dr. H. Vanlalauva, Auxiliary President chuan kaihruaiin, Upa C. Thangnghilhlova, Senior Auxiliary Secretary chuan report a pe a, Rec. Dr. M. Mani Chacko, BSI General Secretary, Bangalore chuan hlanna neiin Rev.C. Rosiama, India Bible Society Trust Association Member chuan lawmthu sawiin hun a khar a ni.