Mizoram State Entrepreneurship Development Monitoring Committee (MEDMOC) leh High Powered Committee (HPC) Lunglei tangkawp buatsaih ni hnih chhung awh (1st – 2nd June 2018) entrepreneurship chungchang zirhona ‘Mizoram Entrepreneurship Conclave 2018’ chu vawiin khan hlawhtling taka zawhfel a ni. 

‘Mizoram Entrepreneurship Conclave 2018’ hi nimin 1st June, 2018 khan Planning Minister Pu Lalsawta’n hawngin entrepreneurship kawnga sawrkar hmalakna hrang hrang leh a hmachhawpte,  thalaiten eizawnna ngelnghet an neih theihna tura sawrkarin ruahmanna a siam te, mahni kut kea dinchhuah tum te tana kawng a kawhhmuh dan te sawihona hun tha tak neih a ni a. Entrepreneur hlawhtling Pi Zomawii Hrahsel, Award Winner ‘Vasundhara North East Women Entrepreneur Award’ hnen atangin thusawi ngaihthlak niin Pu Joseph L. Ralte, Expert Member MEDMOC chuan entrepreneurship chungchangah zirtirna a pe bawk. Lunglei khawpui chhunga Bank hrang hrang manager-te leh Entrepreneuship lama mithiam rual Master Trainer-te kaihhruaina hnuaiah entreprepreuship chungchang zirhona hun tha tak hman a ni bawk. 

He Conclave kharna hi vawiin khan Convention Center Lunglei auditorium-ah neih niin sawrkar official-te, chanchinbumite, khawltlang hruaitute, tlawmgnai pawl aiawhte, entrepreneurs-te leh zirlaite an kalkhawm a. Dr Lalrinchhana, Chief Planning Officer, HPC leh Member Secretary, MEDMOC ni bawk chuan kharna inkhawm hi a kaihruai a. Conclave kharna thu sawitu Dr. C. Vanlalramsanga, Secretary Planning Department chuan ‘Mizoram Entrepreneurship Conclave 2018’ chhimtute zawng zawng chungah lawmthu sawiin thalai tam zawk ten mahni kutkawiha eizawnna kawng an zawh theih nan MEDMOC-in hma a la chhunzawm zel dawn a ni, a ti a. Lunglei mipuiten Conclave-hi ngaihluin mipui thahnem tak an kalkhawm chu lawmawm a tih thu tarlangin sumdawnna bultan tum te tana buatsaih ‘Business Plan Contest’ (Mizoram Kailawn) leh Micro Start Up Capital (Mizoram Rahbi) ah te chhimlam thalai tam zawk an tel ve ngei a duh thu a sawi bawk.

Pi Agnes L. Khawlhring, Associate Professor, Lunglei Government College & EDS Master Trainer chuan ‘Entrepreneurship Scenario in Lunglei District’ tih thupui hmangin zirtirna a pe a. Zawhna leh chhanna hun hman chhunzawm niin Pu C. Vanlalmuana, DRO, Lunglei chuan lawmthu sawiin hun a khar. 

Conclave-ah hian Stall 26 buatsaih a ni a, 'Micro Start-up Competition' titha thlanchhuah ten Exhibition hmangin an thil siam an phochhuak a. Exhibition ah hian mipui thahnem tak kalkhawmin hlut a hlawh hle a ni. Mizoram Entrepreneurship Conclave 2018 hlawhtling taka zawhfel a ni chu MEDMOC chuan lawmawm an tih thu tarlangin Conclave chhimtute leh a hlawhtlinna tura rim taka thawktute zawng zawng chungah lawmthu an sawi a ni.

 

 

Attachment

  • Loading attachment...