Champhai Vengthlang Branch YMA buatsaih, August Ni 8 atanga 10 thleng awh tur Edufest 2018 chu vawiin khan Pu TT Zothansanga, Champhai North bialtu MLA chuan a duhtu apiangte tana tlawh theih turin a hawng. Khuallian hian hawnna neih hnu hian Stall tlawhkualna a nei nghal a ni. 

Hawnna thu sawiin khuallian chuan a vawikhatna tura Edufest Champhaia buatsaih a ni chu hmasawnna anih angin zirna kawnga thalaite harhtharna thlentu ni thei se a duh thu a sawi a. Zirlai kalkhawmte chu ram leh hnam hmakhaw reltu an nih angin an kutah Mizoram awm zel dan tur thui takin a innghat a ni, a ti a. Mi taima leh thawkrimte chauhin hlawhtlinna an chan thin avangin Zirlai naupangte chu an zirlaiah theihtawp chhuah thin turin a fuih a. Nu leh paten zirna senso atan thahnemngaitaka thawkin sum tam tak an seng thin chu zirlaite’n hriatpuia, taimakna nena lo chhanlet ve a ngai a ni, a ti a. Zirlaite chu an zirna tibuai thei thil hrang hrang laka inthiar fihlim thiam turin a fuih bawk a. Pu TT Zothansanga   tum nei rana lehkha zir a,  tum mumal leh fumfe tak siamfel thin tura Zirlai kalkhawmte chu fuihin,    chu mi pui thei tur Edufest chu chhawr tangkai tum theuh turin zirlaite chu a chah nghal bawk a ni. 

Thusawitu dang Pu Lalnghinglova Hmar chuan hna hi sorkar hna ang chauhva kan hrilhfiah chuan lehkha thiam naran tan chuan hnathawh tur a awm tawh lova, mi thiam bikte erawh chuan hnathawh sen loh an hmu thung a ni, a ti a. Champhai chu sumdawnna hmunpui anih avangin mi hausa pawh an pung zel a, zirna lama tlak hniam chuan hausaknain awmzia a neih chuan loh thu sawiin,  zirlaite chu hausakna aia thiamna zawng hmasa  zawk turin a chah a. Social media, infiamna leh thil dang zawng aia zirna dah pawimawh hmasa turin zirlaite a fuih bawk a ni. 

He hunah Champhai District Education Officer Pu C.Lalbiakzauva chuan Edufest chu zirlaite mai nilo zirtirtute thleng pawha hlawkpui theih, zirtirna an pek kawnga tanpuitu anih a beisei thu a sawi a. Sawrkar leh khawtlang thahnemngaihna avangin zirna lamah hmasawnna hmuh tur a awm zel thu a sawi a. Zirlai nu leh pate inpekna avanga zirna hmelhmang danglam chu khawtlang tan chona siamtu nise a duh thu a sawi a ni. 

Edufest-ah hian zirlaite an kal zelna tura pui thei tur Stall hrang hrang hawn a ni a. Zawhfiah duh leh harsatna neite tan councelling class hawn tel a ni dawn a. Heng bakah hian Arts & Craft thilsiam leh Synod Bookroom thil zawrhte zawrhchhuah a ni dawn a. Edufest hi chawhma dar 10 atanga tlai lam dar 4 thleng tlawh theih a ni a. August Ni 10 chawhnu dar 3 hian kharna hun neih a ni ang.