Vawiin chawhma khan Urban Development & Proverty Alleviation Department hnuaia Deendayal Antyodaya Yojana-National Urban Livelihoods Mission (DAY-NULM) hmalakna in Chanmari YMA hall-ah Counselling on Skill Training neih a ni a, UD&PA Minister Pu Zodintluanga chu Khuallian niin Dr C.Vanlalramsanga, Secretary UD&PA chu khual Zahawm a ni bawk.
Minister Pu Zodintluanga chuan, Eizawnnan a hmantlak thiamna bik kan neih a pawimawh hle tawh a, DAY-NULM hmalaknaa Skill Training hi tangkai taka hmanga, thiamna tak tak zirchhuaka, mahni tan, kan chhungte tan leh kan ram tana mi tangkai nih theuh I tum ang u, a ti a. Pu Zodintluanga chuan UD&PA hmalakna hrang hrangte tarlangin, DAY-NULM hmalaknaa Self Help Group din, intodelhna kawnga entawntlak tak tak an awm chhoh mek thu sawiin Skill Training neitur thalai rualte chu hmasawn tuma, tumruhna leh tihtakzetna nen hlawhtlinna an chan ngei theihna turin duhsakna a hlan bawk.
Dr C.Vanlalramsanga chuan Thalai kal khawmte hnenah chuan Thiamna tak nei si lova Certificate neih ringawtin awmzia a neiloh thu sawiin, He skill training ah hian thiamna hmantlak leh chhawrtlak in neih ngeina turin theihtawp in chhuah theuh dawn nia, a ti.
Counselling on Skill Training programme hi Pu Joseph H Lalramsanga, Director UD&PA Department in a kaihruaia, Pu Daniel Lalawmpuia, SMM (DAY-NULM) in Employment through Skill Training & Placement (EST&P) chungchangte a tarlang a. Nl. Guddy Singh, CMM hnen atangin Skill Training chhunga zirlaite hriattur pawimawhte ngaihthlak niin Skill Training Provider leh MSACS aiawh atangte in thusawi ngaihthlak a ni bawk.
DAY-NULM hi Ministry of Housing and Urban Affairs hnuaia sawrkar laipui Flagship programme a ni a, 24th September 2013 khan bul tan niin Mizoramah hian UD&PA Department in he hmalakna hi a kalpui a ni. DAY-NULM hnuaiah hian hmalakna lian tak tak hlawm Nga a awm a, Social Mobilisation & Institutional Development (SM&ID), Employment through Skill Training and Placement (EST&P), Self-Employment Programme (SEP) ,Support to Urban Street Vendors (SUSV) leh Scheme of Shelter for Urban Homeless (SUH) te anni a, heng zinga hlawm lian ber, Employment through Skill Training and Placement hnuaiah hian he Skill Training hi kalpui a ni.
Aizawl district ah hian Skill Training Provider Pangnga (5) an awm a, chungte chu KABOD inc. Pvt Ltd, Social Justice & Development India, Divine Skill Training Centre, Eternity Partner leh Ascensive Educare te an ni a, heng skill training provider te hian course hrang hrang 13 ah training an pe dawn a ni. He Skill Training ah hian zirlai 985 inziak lutin Automotive Service Tech, Beauty Therapist, Field technician & Computer peripherals, Electrician, Fashion designing, General Duty Assistant Security guard, Sampling tailor, LMV Driver leh a dangteah training pek anni dawn a. Course zawng zawng hi National Skill Qualification Framework mila duan vek niin Skill Training Provider te hi National Skill Development Council training partner an nih bakah an Course kalpui theuhte hi Sector Skill Council ah ziahluh vek a ni bawk.
