Vawiin chawhnu dar 1 khan Zomi hnamte Kut pawimawh tak ‘Khuado Pawi 2017’ chu Sesih khuaah tan a ni a. He hunah hian Champhai North bialtu MLA Pu TT Zothansanga chu khuallian niin kut hi a hawng a ni. Khuado Pawi - 2017 hi ni hnih chhung awh tur niin a hmanna pui ber chu naktuk lamah neih a ni anga, he hun hian Mizoram Chief Minister Pu Lal Thanhawla chuan a hmanpui dawn a ni.
Pu TT Zothansanga chuan zomi hnam hruaitute inpekna leh hmalaknate chu fakawm a tih thu a sawi a. Pipute sulhnu leh culture min hnutchhiahte chawi nung zel angaih thu sawiin hemi kawngah hian thangthar leh mithiamte chuan hma an lak zel angaih thu a sawi a. Khawvel hmasawnna leh changkanna kal zelah hnam tenau leh tlem zawkte chimrala kan awm mai loh nan zirna leh thiamna kawngah nasa zawk a tan lak angai a ni, a ti a. Ram buai vang leh harsatna dang dang vangin u leh nau kan inthendarha, inunauna vawn nung kawngah khawchhak lam tlangdunga awmte hi kan mawhphurhna a san bik thu tarlangin tunlai huna hnam inpumkhatna leh insuihkhawmna sawi uar anih mek laia Electoral Roll lama kan fir lutuk chuan he thil hi a tih thuanawp theih thu a sawi a. Champhaia Zomi Sub-Hqtrs ten Zomi Inpui an sakna turah leh Zomi ten Tribe Recognition an dil chungchangah pawh a theih angin sawrkar lamah pawh hma lo laksak a tum thu a sawi bawk a ni. Khuallian chuan Zomi hnam Mizoram hmun hrang hrang atanga kalkhawmte chu hlim tak leh nuam taka Khuado Kut hmang turin duhsakna a hlan nghal bawk a ni.
Khuado Kut hi zomite kut zinga pawimawh ber leh awmze nei ber a ni a. Kum khat chhunga an hnathawh atanga buh leh balte an seng zawh avanga lawmthu sawina leh an hmalam hun lo la thleng turte thlirlawkna leh aienna a ni a. Kum thar kut tite pawhin an sawi bawk thin a ni. Kum khat chhunga an thlai ther hmasak ber ei hmain thlanah thlai chhiah an pe hmasa ziah thina, chumi awmzia chu boral tawh pi leh pute ( malsawmtute) pe hmasa, ‘do’ hmasa tih atangin Khuado tih hi a lo piang ta a ni. Chuvang chuan khuado Kut ni hmasa berah chhang an denga thlanah mitthi tawhte an pe hmasa ( thlai chhiah) ziah thin a ni. Hriat thieh chinah Kum 1400 AD ata tawh kha hman tawh niin kum 600 aia rei mah hman a lo ni tawh a ni. A tlang puiin Sept 15 leh October ni 15 inkara nithum chhung ruat niin hman ani thin a. Chin State, Myanmar-ah chuan Sawrkar Holiday-ah an puang nghe nghe a ni. Kut hun chhung hian ei lehin hnianghnar taka buatsaih thin a ni.
Tun dinhmunah Mioram puma Zomi population hi singli (40000) vela chhut a ni a. Zomi Cultural Society ( ZCS) hi February ni 20, 2010 khan din a ni a. General Headquarter hi Aizawlah a awm a. Champhai Sub- Hqtr bakah Zomi Unit 21 a awm mek bawk a ni. Khuado Kut hi kum khat dan zela neih thin a ni.
Vawiin hawnna programme-ah hian Upa Hang Thawn Tuang-an kalkhawmte lawmna leh inhmelhriatttirna a nei a. ZCS General Hqtr. Gen Secretary leh ZCS Champhai Sub-Hqtr, Secretary-te hnen atangin report ngaihthlak a ni a. Pu Pa Gin Za Go, President Zomi Literature Society-in Zomi Literature a sawi a. Rev Kham Khan Thang-an hunkharna a siam a ni. Heng bakah hian programme chhung zawngin mal zai, lam leh costume parade-te neih a ni a. Chawhma lamah ZCS General Assembly leh Free Medical Clinic-te neih a ni bawk a ni.
