Vawiin khan Pu Vanlalenmawia MJS, Member Secretary, Mizoram State Legal Services Authority chuan Kolasib District Court tlawhin Advocate te leh 'Para Legal Volunteer' (PLV) te a kawm.

Pu Vanlalenmawia hi Pi Sylvie Z Ralte, MJS, CJM Kolasib cum Senior Civil Judge leh Pu Biakzama, MJS, Judge, Fast Track Court cum Addl District & Sessions Judge ten tawiawmin PLV te nen inkawmhona an nei a, he hunah hian Pu Vanlalenmawia chuan PLV te chu tanpui ngaite tanpuitu an nih angin midang tanpuina kawngah theihtawp chhuah chhunzawm zel tura fuihin khawtlang ah pawh midang zah kai tura beisei an nih angin mahni nun theuh uluk taka vawng turin a chah bawk a. Internet Service emaw Banking Service emaw Sawrkar Service ah pawh nise harsatna tawkte chu an tanpui zel tur a ni tiin mipui tana an hnathawh ropui tak chu chhawm nung zel turin a chah bawk a. PLV ten an hmalakna thatak te chu District Legal Services Authority (DLSA) ah thlen in DLSA chuan State Legal Services Authority ah thlen leh in State chuan National ah thlen in chu chuan Mizorama PLV te hmalakna tha tak tak te chu hriat a hlawh tir anga Sawrkar Laipui ina PLV thawk tha te chawimawina a hlan thin Best PLV lawmman chu dawn tum theuh turin  a chah bawk a ni. Pu Vanlalenmawia hian Kolasib khaw chhunga zirna hmun hrang hranga din thar 'Legal Literacy Club' bakah District Jail a tlawh bawk a ni.

'Legal Literacy Club' hi India khua leh tui ten mahni dikna leh chanvo bakah ram leh khawtlang laka kan mawhphurna te zau thei ang bera kan hriat theih nana din niin tun dinhmunah Kolasib khawpui chhunga zirna hmun panga ah din a ni.

'Para Legal Volunteer' te hi kawng hrang hranga harsatna tawk te tanpuitu an ni a, a theihna apianga inremna siamtu niin a tul dana zirin harsatna tawkte chu Lok Adalat ah kal puiin harsatna te chu sutkian dan tur an zawnpui thin a ni. PLV te hi Sawrkar atangin hlawh an nei lova harsatna tawkte an tanpuina kawngah erawh Sawrkar in lawmman a siamsak thin a ni. Tun dinhmunah Mizoram pumpui ah PLV 298 awmin Kolasib District ah PLV 27 an awm mek a Legal Aid Clinic 11 a awm a ni.

PLV te'n Harsatna an chinfel pui thin hi kawng hrang hrang a ni thei a, Internet emaw network/signal chhiat a vang te, bank dawrna kawnga lungawilohna te (Banking Service deficiency), Sawrkar Office dawrna kawnga lungawilohna te, Damdawi ina inentir na kawnga lungawilohna te, Accident tawk avanga harsatna nei te, chhungkua emaw nupa inkara harsatna awm te leh thil dang dang a ni thei a, heng harsatna hrang hrang tawkte hian PLV te hi an pun thei a, an niin a tul dana zir zelin an lo tanpui thin a  Lok Adalat leh Consumer Court ah te an thlen thin a.

PLV te hian harsatna hrang hrang sutkianna kawngah nasa takin tha an thawh a hemi bakah hian thil diklo tamtak chu a ti diklo tu chungah danin ro a rel theih nana hma la thin an ni a, tun hnai a Punjab mi leh sa ina Kolasib District chhunga khaw hrang hrangah Handset Power Bank lem an zawrh chungchangah pawh khan Bilkhawthlir khua a PLV Pu Zothankima Zote leh Hortoki khua a PLV Pu Vanlaltiama Colney te chuan theihtawp chhuahin heng thil diklo ti tute 5 lakah hian hma la in, lung inah dah luh an ni, hemi bakah PLV te hian chhungkua leh nupa inkara harsatna tawkte leh upa/tar pension hlawh chungchanga buaina tawkte pawh an lo tanpui nasa viau tawh thin  a ni.