3337/2023-2024

Aizawl 13th January, 2024 : Tukin khan Pu Vanlalhlana, PWD Minister chuan Durtlang 'N' to Sihphir kawng zauh hna thawh mek chu a hmunah kalin a endik.

Durtlang 'N' to Sihphir inkar kawng hi 10.25 Km niin Central Roads and Infrastructure Fund (CRIF) Scheme hnuaiah a zauh hna hi thawh a ni a. Project Cost hi ₹4657.00 lakh niin thla 30 chhunga thawh zawh hman tura ruahman a ni. 14th July, 2023 -ah hna hi tan niin Executive Engineer PWD, Aizawl Road North Division thuneihna hnuaiah M/s SLT Infracon Private Limited te'n kawng zauh hna hi an thawk mek a ni.

He kawng laih mek avang hian Road block thin a nih avang leh a thawktu contractor te'n formation cutting an zawh veleh mipui  veivak te'n harsatna an tawh loh nan GSB (Granular Sub base) phah nghal thin turin Minister hian a hrilh a. Kawng siam mek hi GSB chungah Dry Lene Cement (DLC) concrete (M15) leh PQC (pavement quality concrete) (M40) phah leh tur niin a pumpuia kawng chah zawng hi metre chanve a tling dawn a ni.

Tukin vek hian Minister leh PWD hotute hian Khelo India hnuaia 4.5 Crore senga sak tur Indoor Sports Complex hmun laih zauh dan tur leh a panna Approach Road Motor lian leng thei tura laih zauh dan tur an enho bakah Leitan Zotui veng atanga Zuangtui Selesih kawngpui pawhna kawng RCC Balcony-a  siam chu a hmunah a tlawh nghal bawk. Durtlang 'N' leh Selesih khawtlang hruaitute'n Minister hi lo hmuin an harsatna te an lo thlen bawk a ni.

PWD Minister hi Er. H. Zoramthanga, Chief Engineer (Highways) PWD, Er. Lalchhuana, Superintendent Engineer (Central Circle), Executive Engineer (National Highway I) bakah Officials dangte'n an tawiawm a ni.