3338/2023-2024

Aizawl, the 13th January, 2023: PWD Minister Pu Vanlalhlana chuan vawiin chawhma khan Bawngkawn to Zemabawk National Highway siam that mek leh Vaivakawn leiminna hmuna kawng siam hmalaknate tlawhin a enfiah.

PWD Minister Pu Vanlalhlana chuan PWD hmalakna hnuaia kawng siam leh enkawlte tih mai mai a theih dawn loh thu sawiin, PWD hotute chu kawng tha ni tura tehfung hrang hrangte tlin ngei tura uluk taka hmalaknate vil thin turin a chah a. Hna thawh mekte a hmunah ngei enfiaha Contractor-te pawh an hmalaknate enpui zel turin a chah a. Vaivakawn leimin avanga harsatna tawh leh hmalaknate pawh tlawh nghalin harsatna dang a thlen loh nan furpui thlen hma ngeia ruahmanna siama peihfel hman turin Department hotute a chah bawk.

Bawngkawn to Zemabawk National Highway siamthat hna hi M/s SLT Infracon Pvt. Ltd te'n EPC Mode-in an thawk a, Rs. 5,63,17,000/- senna tur niin January ni 6, 2024 khan hna hi tanin July ni 6, 2024 ral hmaa zo hman tura tih an ni a. Hna zawh fel atanga kum 3 chhung a enkawl leh venhim hna an thawk chhunzawm ang.

Bawngkawn to Zemabawk National Highway siamthat hna hi 7.00 km a thui tur niin, a chhah zawng 40 mm, kawng zau zawng chawhrual 8.20 m ni tura ruahman a ni a. Road marking hrang hrang centre line, edge marking leh zebra crossing-te a kengtel bawk ang.

Kawng siamtu Contractor-in a nih dan tur leh tehfung bituk hrang hrangte a zawm tha em tih PWD Minister hovin measurement hmanga teh thlap a ni a, kawng thui lam, zau zawng leh chhah dante pawh enfiah niin uluk taka zirchian a ni a. Heng bakah hian kawng siam nana Bituminous Concrete (BC) hman lum zawng (Temperature) te pawh Minister hmuh lai ngeia enfiah a ni a. Contactor-te chu inthlahdah lova kawng tlo leh tha tak, ram tana chhawrnahawm leh hmasawnna ruhrel pawimawh tak siam tura tan la tura chah an nih bakah a viltu Department thawktute pawh thahnemngai taka kawng siam hna vila enzui tura chah an ni bawk.

Vaivakawn leiminna hmunah hian mamawhna avanga kawng bal thawmthat hna hmasa leh hman lailawk tur PWD in a thawh mekte enfiah niin, ruahman dan chuan karleh chhunga zawhfel hman beisei a ni a. Heng bakah hian kawng tha zawk leh tlo zawk fur ruahtui tlak hma ngeia peih fel hman a nih theih nana hmalak tulte leh awmze nei zawka tui luankawr siam dan turte pawh sawiho a ni a. Line Department dangte nena hmalakho tul dante pawh sawiho a ni bawk.

PWD Minister hi Er. H. Zoramliana, Chief Engineer (Highways), Er. Lalchhuana, Superintending Engineer (Central Circle), Er. Robin Lalrinawma, Superintending Engineer (National Highway I) leh Official dangte'n an tawiawm a ni.