727/2024-2025

Tlangpui, 8th June 2024: Vawiin khan Pu W. Chhuanawma, Dy Govt Chief Whip, Tuichang bialtu MLA chuan Tlangpui khuaah Varhva lei a hawng.

Varhva lei hi Tlangpui leh Khawlailung inkalpawhna tangkai tak a ni dawn a, Mizoram khaw chhak lam leh chhim lam district te inkalpawhna nasa takin a tihnai dawn a ni.Lei hi feet 9 a zau, feet 10 a sang, a ban leh ban inkar teha feet 29 a thui a ni. Lei siam nan hian cheng nuai 5.8 (₹5,86,318) hman a ni a. Lei siam nan hian Tlangpui khawtlangin ₹1,90,670, Tlangpui Welfare ten ₹1,74,100, Bialtu MLA Pu W. Chhuanawma’n ₹30,000 an thawh a,  he mi bak zawng ₹1,91,548 hi Pu H. Lalsiamliana’n a tum sak a ni. Lei dawh nan hian khawtlang leh mi thahnemngai ten tha leh sum nasa takin an thawh a, heng zawng zawng nena chhut hian nuai 10 chuang seng anga ngaih a ni.

Lei hawnna inkhawm Tlangpui Community Hall-a neihah hian Pu W. Chhuanawma chuan Tlangpui khawtlang ten  sawrkar tha chakna beisei mai lova, tanrualna hmanga lei an dawh chu ropui a tih thu sawiin Zoram puma puandarh tlak chanchin ngaihnawm leh ropui a ni, a ti a. Tuichang bialtu MLA hian Tlangpui khaw hmalakna chu Mizoram khaw dangte tan pawha entawntlak nia a hriat avangin Assembly House-ah hial pawh a lo sawi chhuak tawh a, Assembly Recess Room-ah ngei pawh Member dang ten hriat chian chakin an zawt zui  tih a tarlang.

Dy Govt Chief Whip Pu W. Chhuanawma chuan John F. Kennedy a thu sawi lar tak pakhat ‘Ramin enge min tih sak ang ti lovin, Ram tan enge ka tih theih ang’ tih thu chu Tlangpui khawtlang nunah a lang chiang hle a ni, a ti a. Lei dawhna tura tha nasa taka thawhtu Tlangpui khawtlang mipuite, khaw chhuak leh Pu H. Lalsiamliana te chungah lawmthu a sawi a ni.

He huna thusawitu dang MIFCO Chairman Pu Lalthazuala Royte chuan MIFCO chu loneitute leh kuthnathawktute banphakah awm an tum tih a sawi a. Bialtu MLA Pu W. Chhuanawma ruahmannaa sapthei leh lakhuihthei chingtute kawmna hun tha a nei thei chu lawmawm a tih thu a sawi bawk. Kuthnathawktu ten man man zawk leh hlawk zawka thlai an hralh theih nan sawrkarin hma a la dawn a, mipuite chu taima taka hna lo thawh chhunzawm zel turin a ngen a ni.

Varhva lei hawnna inkhawm hi Tlangpui VCP Pu Lalbiaktluanga chuan a kaihruai a. Pu H. Lalsiamliana chuan Varhva lei din a nih dan technical report a pe a ni.