726/2024-2025

Tualpui, 8th June 2024: Tualpui khawtlangin an buatsaih, Chief Minister Pu Lalduhoma chawimawina hun chu nizan khan Tualpui Mual zawlah a kharna hun hman a ni.

Chief Minister Pu Lalduhoma chuan hun lawmawm tak an hmang thei chu  a vanneihthlak hle a ni, a ti a. He hun hmang tura an inbuatsihna kawngah Tualpui khawtlang chuan an theihna zawng zawng an hlan tih a hriatpui thu sawiin an chunga khawtlang thatna chu an chhungkuain an theihnghilh tawh loh tur thu a sawi.

Chief Minister hian Tualpui khawtlangin nikhat thil thuah Minister-te kaltlanga thilpek an dawn chu a tam thamin, a lawmawm hle tih a sawi a. Tualpui khua, miin an hriat ngai loh chu tunah chuan mi hriat hlawh a lo ni ta a, hei vang hian  ram pum entawn tur an ni tih inhria a, khawtlang inrelbawlna pawh mite entawntlaka kalpui turin a ngen a ni.

Agriculture Minister Pu PC Vanlalruata, PWD Minister Pu Vanlalhlana leh Dy Govt Chief Whip, Tuichang bialtu Pu W. Chhuanawma te chuan Tualpui khuain Pu Lalduhoma chawimawina hun an buatsaih an hmang ve thei chu lawmawm an tih thu an sawi a. Pu PC Vanlalruata hian Tuipui atanga Tualpui Rusi Ramah Agriculture Link Road an lai hmasa ber dawn tih sawiin; Pu Vanlalhlana hian Khawzawl atanga Rabung Peng kawng chu kumin chhung ngeia siam that an tum tur a sawi bawk a ni.

Aizawl South - II bialtu MLA Pu Lalchhuanthanga chuan Tualpui khawtlangin Pu Lalduhoma lawmna leh chawimawina hun an buatsaiha a tel ve thei chu a lawm thu a sawi a. Tualpui khua chu khaw nuam tak, faina leh ramngaw humhalhna kawnga thawk tha khua an nihna chhawm nung zel turin a chah.

Pu Lalduhoma chawimawina hun kharna programme hi Pu Malsawmdawngtluanga, Joint Secretary, CM Chawimawina Organising Committee chuan a kaihruai a. Pu C. Sangthuama chuan chhungkaw aiawhin thu a sawi a; zai, lam leh drama te enho niin, Organising Committee Chairman Pu C. Lalromawia’n lawmthu sawina hun a hman zawhah inkhawm hi tihtawp a ni.