Vawiin dar 11:00 a.m. khan Presbyterian School, Keifang chuan HSLC 2011 result an lawm a. HSLC result lawmna hun hi Keifang Community Hall-ah hman a ni a; Bialtu MLA leh Home Minister Pu R. Lalzirliana chu Khuallian a ni a, Rev. Mangchhuana Sailo, Presbyterian School Supervisor, Mizoram Presbyterian Kohhran chu Khualzahawm a ni.

Keifang Presbyterian School HSLC result lawmna hi Upa Rohmingthanga, Treasurer, School Managing Board-in a kaihruai a. School Principal Pu Zionthanga chuan report a pe a. Pu Ralmanliana, Keifanf VCP chuan thu sawiin Upa C. Lalmuanga, Chairman, School Managing Board chuan lawmthu a sawi a ni. HSLC result lawmnaah hian Keifang Presbyterian School zirlai leh zirtirtu te, HSLC pass tharte leh an nu leh pa te, he sikula lo zir chhuak tawhte leh khawtlang hruaitute an tel tha hle.

Home Minister Pu R. Lalzirliana chuan thu sawiin nu leh pa te, zirtirtute leh zirlaite pawimawhna hrang hrang a sawi a. Tunlai khawvelah hriatna leh thiamna a pawimawh tih sawiin zirlaite chu an zirlai pawn lam thleng pawhin lehkhabu chhiar uar turin a fuih a. Mizo zirlai hmun hrang hranga lehkhazira Mizoram pawna awm ten an awmnaah Mizo nihna an vawnhim reng a pawimawh tih sawiin tlawmngaihna leh aia upa zahna te vawng nung zel turin a chah a ni.

Home Minister chuan 2011 Chhiarpui chungchang sawi langin Mizorama mihring kan pun dan hi en chian a ngai tih a sawi a. India ram puma ziak leh chhiar thiam tam lamah 3-naah kan tla thla a; chutihrualin ziak leh chhiar thiam 2.78% laia kan pung chu thil lawmawm a ni tih a sawi bawk.

Khualzahawm Rev. Mangchhuana Sailo chuan Presbyterian School din a nih chhan chu zirna lama hmasawnna tur a nih rualin hnam nun tlu chhe mek siamtha tura zirna hmanga Kohhran hmalakna a ni tih a sawi.

Keifang Presbyterian School hi 1997-a din a ni a. Mizorama Presbyterian School 86 zinga HSLC result nei hmasa 4 zingah a tel a ni. Kum 2003 khan MBSE atangin recognition hmuin tun thleng hian HSLC batch 7 a awm tawh a, he sikul atang hian mi 117 in HSLC an pass chhuak tawh a ni. MESLC pawh batch 9 awm tawhin mi 127 in an pass chhuak tawh bawk. A din tan 1997 khan zirlai 75 awmin tun kumah hian zirlai 538 an awm mek a. HSLC 2011 result chhuakah hian naupang exam zawng zawngte pass vekin Distinction 2, First Division 8 leh Second Division 8 an awm a; subject 1 tala letter mark hmu pha 15 an awm bawk.