Vawiin khan Mount Carmel School, Chaltlang chuan kum 2011 HSLC Exam a an zirlai hlawhtlingte chawimawina hun an hmanga. Education Minister Pu Lalsawta chuan khuallian niin he hun hi a hmanpui a ni.
Pu Lalsawta chuan Mount Carmel School zirlai leh zirtirtute chu an hlawhtlinna a lawmpui takzet thu sawiin, an sikul chu zirlaite leh nu leh pate tana innghahna tlak, rin tlak School tha a ni, a ti a. Sorkar chuan zirna kawnga Mizoram hmasawnna tur a tan a lakna kawngah thil thar tam tak, Continuous and Comprehensive Evaluation (CCE) leh Right to Education, 2009 te hmang tanin, Education Reforms Commission-te hial a din a. Sawiselna karah pawh sorkar chuan Mizoram a hruaina kawngah a tum ram a hmuh chian em avangin hma an sawn zel dawn a ni, Minister chuan a ti a. Ram danga an lo chin tawh thil tha, zawng chhang tlak ni a an ngaihte chu a tul dan angin kan hmang chho zel ang, a ti. Mi fing leh thluak tha apiang chungnunna khawvelah hian Mizoram pawhin thil siam chhuah kawngahte, ram leilung hausakna (natural resources) neih tam kawngahte ram dangte el pha lo mah se, zirna hmang hian khawvel a hneh thei a ni, Education Minister chuan a ti bawk.
Mount Carmel School hi 1987 a din niin tun thleng hian he sikul atang hian zirlai 1554 in HSLC an pass chhuak tawh a. 2011 HSLC Exam ah hian an school hminga exam mi 100 te chu an pass vek a, an zirlai F Lalvenhimi chu tun tum Exam-ah hian Mizoram pumah pakhatna a ni.
