Vawiin khan UD & PA Department huaihawtin Aijal Club ah One Day Workshop and Sensitization on National Mission Programmes hman a ni a, UD & PA Minister Pu Zodintluanga leh Parliamentary Secretary Pu Hmingdailova Khiangte in an hmanpui a, Dr C Vanlalramsanga, Secretary UD & PA in a kaihruai a ni.
UD & PA te tan vawiin ang programme hi neih a tul leh mamawh a nih avangin, mumal taka programme tha tak tak duanchhuah a ni chu lawmawm a tih thu khuallian Pu Zodintluanga chuan sawiin Central in schemes an neih leh an siam ang chu Mizoramah pawh theih anga lo thawh ve zel tur anih avangin thawktu te inthlahdahna hman a awm lo va, rilru leh tihtak zeta thahnemngaihna nen thawh a tul a ni a ti a. Tunah Central atanga lo kal Swatch Bharat Mission ah pawh thawhho na a pawimawh hle dawn a, khawpui leh thingtlang a lo fai a, a lo hrisel nan mitinin kan ngaihpawimawh a ngai a ni tiin tui in tur thianghlim leh vantlang Ek in ah te pawh hmasawnna hmuhtheihin thingtlang ah phei chuan a awm tawh thu a sawi bawk.
A tir atangin Aizawl hi Plan fel tak a awm loh avanga kawngpui chep dan leh tunah harsatna kan hmachhawn dan sawiin khuallian chuan tihsual lo awm tawh avanga insiamthat nan kawngpui leh in sak dan ah remruatna Plan mumal tak neih a ngai a, District lam ah phei chuan hei hi an ngaih pawimawh a ngai a ni a ti a, UD & PA hmalakna hrang hrang ah District Bawrhsap ten thahnemngai leh uluk taka hma an lo lakpuina ah lawmthu a sawi nghal a, thil thar zir chhoh zel a ngaih avangin vawiin workshop chu tangkai taka hmang tur leh hriatfiah loh te chu inthlahrung hauh lova zawt zel tur in Minister chuan a chah a ni.
Khualzahawm Pu Hmingdailova Khiangte, Parliamentary Secretary pawhin thu sawiin George Washingtona pawh vawi tam tak a hlawhchham hnu leh a bialnu ngei pawh a chan hnu ah rilru beidawnna hneh in a harsatna a in delhbehtir lova, USA President ah a invawrh chho dawrh mai a ni tiin, tumruhna leh beiseina neihin hlawhtlinna a awm thin a, chutiang chuan kan hnathawhna kawngah pawh rahtha zawk chhuah thei ngei turin rilru kan siam a ngai a ni a ti
Dr. C. Vanlalramsanga vawiin Workshop kaihruaitu chuan sawihawnna neiin UD & PA hi Mizoramah phei chuan Department lian lo leh la naupang tak a niin thawktu lam pawh indaihlohna a awm chung in Department changtu Minister in a kaihhruai thatna ah leh an hnathawh a kil thlenga a enpui leh a hriatpui thin na ah lawmthu a sawi a, harsatna te awm thin mahse sutlang in kan tu leh fate tana chhuanawm tura hna kan thawh a ngai a ni a ti.
Vawiin programme ah hian department hnathawh dan hrang hrang an zir ho nghal a ni.
