Vawiin ah khan Mizoram Governor Lt.General(Rtd) Nirbhay Sharma chuan Raj Bhavan Durbar Hall ah riru lama rualbanlote tana Olympics buatsaih, Special Olympics, 2015, Los Angeles a India ram aiawh tur Mizo thalai 6 leh an hruaitu pakhat te thlahna hun  a buatsaih sak a. He hun hman zawh a nih hian  hlawhtling taka va fehchhuakturinMizoram team te chhuanna Bus hi Raj Bhavan south Gateatangin  vai liam nghal a ni.

Fuihna thusawitu Governor  Lt.General(Rtd) Nirbhay Sharma chuan Special Olympics a tel tur te chu an ropui thu leh mi bik annih zia te hrilh in M.K. Gandhi leh Mother Teresa thusawi ropui tak tak te hrilh in hlawhtlinna ropui tak chang a India ram ti  hmingtha zual tur in duhsakna a hlan a. Mizoram sawrkar leh mipui te pawh in an thlawp tlat thu sawiin zam hauh lova pen chhuak tur leh chawimawina medal Mizoram ah rawn hawn ngei turin a chah a ni. Kargil indona avanga a ke lehlam chantu Maj. Devendra Pal Singh a pawh a beidawn duhloh avangin ‘India’s Blade Runner’ tih khawp hiala lar in pianphunga rual ban ni tawh lo mahse infiamna khawvel ah hming a rawn chher leh thei a ni tiin piangphunga rualbanlo fanau nei nu leh pa te chu an fate chawk phur a beiseina siam sak turin a chah bawk a ni.

Special Olympics, 2015 ah hian India aiawh in Infiammi 301 an tel dawn a, hmarchhak states atang chuan Mizo infiammi 6 leh Assamese 2 chiah an thlang a ni. Special Olympics, 2015 hi July 23 ah tan in August 3 ah zawh a ni ang.  Mizo infiammi India aiawh tur  atang hian 11 a-side(Football) ah Alfred Lalchhanhima S/o R. Zonunmawia, Gilead Special School leh Lalmawizuala s/o Lalhmangaiha(L),  Gilead Special School than an ni a. 7 a-side(unified football) ah Thanghmingliana s/o Vanlalrema(L), Gilead Special School, Lalfakzuala S/o Lalhmingthanga, Armed veng leh Lalthansanga Fanai(unified partner) Govt. Aizawl College Football Player te an ni a. Athletics(100 & 200 metres) ah Zohlupuii D/o Zothankima(L), Tuikhuahtlang a tel thung ang. Mizoram atanga thlan chhuah te hruai tur hian he Olympics atana Head Coach, India Female Basketball Team Sarah Lalmuankimi chu ruat a ni.

Mizo infiammite thlahna kaihruaitu Pu Zoliana Royte, Area Director, Special Olympics Bharat chuan Olympics tih hming pu infiamna lian tham ah tun tum hi Mizo infiammite an tel vawi 2-na anih vangin ngaihhlut leh ngaihven a phu a ni a ti a. Heng Mizo infiammi 6 te hi Sports Minister Pu Zodintluanga in Kit Allowances atan Rs.10,000 theuh a lo hlan tawh thu leh MSSC in an hak tur Track suit a pek tawh thu a tarlang bawk. Olympics neih chhunga an hak tur Uniform, T.shirts, track suits leh back packs te hi World Wrestling Entertainment(WWE) in a sponsored bakah Olympics huaihawttu hnen atang in infiammi te hian nitin $25 theuh ni 10 chhung hian an dawngziah dawn bawk a ni. Samsung 3:16 Plan Solution pawh in infiammi te hi  an zavaiin track suits a pe vek a ni.

Attachment

  • Loading attachment...