Nimin khan  ni 19.6.2015  a Mizoram Sawrkar a din, State Level High Powered Committee for Smart Cities Mission in Mizoram(HPSC) chu an chairman Pu Lalmalsawma, Chief Secretary hovin an thu khawm a.

A vawikhatna atan a thukhawm HPSC chuan Central in smart city atana tehfung a siam atanga tling awm chhun, Aizawl khawpui chu Smart City project kalpuina hmun atan a rawt a.  He rawtna hi Mizoram in Central sawrkar ah a thehluh leh a ngai dawn a. Nimina HPSC meeting chuan Smart City Project thawhna tura Central in a chanve ve ve a sum senso intum sem tur a tih lai chu zirchian phawt tha a ti a. Central  Sawrkar in ruahmanna a siam dan chuan Smart City project hi Centrally Sponsored scheme(CSS) hnuai  ah central-state  50:50 Funding  hmanga thawh tur a ni.

Smart Cities Mission khuh hawnna hi June 25, 2015 khan New Delhi ah neih a ni a, he hunah hian UD&PA Minister Pu Zodintluanga leh Chief Secretary Pu Lalmalsawma te bakah UD&PA Department hotulu te pawh an tel a ni. Smart Cities Mission in a tum ber chu khawpui felfai buatsaih a ni a,  he khawpui ah hian tui leh electric supply hnianghnar taka sem, bawlhlawh leh hnawmhnawk awmze neia chinfel, mirethei te chenna tur buatsaih sak, Information technology hman tangkai, khawpui chhung leh boruak vawn thianghlim , zirna hmun leh damdawiin tha din bakah  thil tangkai tak tak ruahmanna te a tel a ni. Mizoram chhunga Smart City Mission Director atan hian Secretary, UD&PA  chu ruat a ni a. Mizoram in he project hi a kalpui thei a nih chuan Central puihna he Mission atan hian kum 5 chhung kumtin Rs. 100 Crore ang hu a dawng ziah dawn a chhut a ni.