India ram aiawha Goods and Service Tax zira thang mek Empowered Committee of Finance/Taxation Ministers leh officer te chuan Vancouver (Canada)-ah thil pawimawh tam tak an zir hnuah September 23 tlai lamah Tokyo an thleng a. Vancouver an cham lai hian Meghalaya Chief Minister, Pu Mukut Sangma pawhin a rawn fin ve tawh a. Tin,Tokyo-ahAssamChief Minister, Tarun Gogoi pawh a lo thleng chho ve bawk a ni. An thlen zan hian Tokyo High Commissioner Pi Deepa Gopalan Wadhwa chuan zanriah a lo buatsaih sak nghal a ni.
September ni 24 khan Japan ram Senior Vice Minister, Finance chuan heng delegation zinga Chief Minister leh Minister hote chu lo kawmin thil pawimawh sawihona tha tak an nei bakah Tokyo khawpui hmun pawimawh thenkhat leh sawrkar sulhnu pawimawh thenkhat an enpui bawk.
September ni 25 zing atangin Ministry of Finance office-ah Seminar neih a ni a. Japan rama Consumption tax, GST leh VAT an kalpui dan zir chianna Seminar nilengin neih a ni. Hei hi Senior Vice Minister of Finance, Pu Fumihiko Igarashi chuan a rawn hawn (inaugurate) hnuah Ministry of Finance-a Deputy Director Pu Nobuhisa Abe leh Pu Hideto Funaki ten kimchang takin thil chinchang an lo kawhhmuh a ni. Tlai lamah Minister rualte chu Koichiro Gemba, Minister of Foreign Affairs in zanriah an lo kilpui bawk a ni.
Heng programme zawh hnuah hian India palaite zin chhan Canada leh Japan rama GST an lo kalpui dan kimchang zirhona an neih chu a lo zo ta a. Ram tana tangkai tur bengvarthlak leh finthlak tak tak an zir chhuah bakah India palaite hian India ramin international trade leh business kawnga a hamthatna turin awmze nei takin mi pawimawhte kawmna an nei nghal bawk a ni.
Taxation Minister Pu Zodintluanga chuan mi rama roreltute leh sawrkar hnathawkte thawhrimzia leh thahnem an ngaih dan a hmuhin a rilru a khawih hle a. Thalai zawkte taimakna leh hnathawk tura chapona diklo an pai lohzia te hi an ram hmasawnna rahbi siamtu niin a hmu a ni. Taxation Minister hi naktuk ahTokyochhuahsaninDelhia lo thlen beisei a ni.
