State Bank of India (SBI) in an Bawngkawn Branch kaltlanga Thutak Nunpuitu Team (TNT) hnena motor LPK 407 Tipper a pek chu vawiin tlai khan SBI Bawngkawn Branch-ah Chief Minister Pu Lal Thanhawla chuan TNT Vice Chairman Pu Biakvela hnenah a hlan.

Motor pek hlanna inkhawm buatsaihah Chief Minister chuan SBI in Community Service Banking an kalpuina hnuaia motor TNT hnena an pek chu a lawmawm hle a, he Corporate Social Responsibility Scheme an kalpui hi mipui tan hnemhnanna tha tak a ni a, a lawmawm tak zet a ni a ti. Banking serviceah SBI chu Mizoram chhung thingtlang khuaa inzar pharh ber a ni hi Mizoram tan a vanneih thlak a, khaw thahnem taka branch an hawnnaah te a telpui tawh thin a ni a ti a. SBI in TNT mamawh tak LPK 407 an pe chu a lawmawm tak meuh a ni a ti.

Chief Minister chuan TNT hi intodelh tum, tunah pawh hian NLUP hnuaiah hmunphiah an ching a ni a ti a. Fahrah, rualbanlo, mi-a leh ngawlveite enkawltu an nihna ah pawnlam mi tam tak hriat hlawh tawh an ni a ti a. Phailam atanga khual tha a neih chang tein, TNT zai pawl leh pipe band te a sawm thin thu a sawi.

SBI General Manager, N.E.Circle Pu Farooque Shahab chuan Corporate Social Responsibility Scheme, Community Service Banking an tih hi mipuite hamthatna tura dah a ni a ti a. An kalpuina ala rei vak loh thu sawiin, SBI in kum khata an hlep atanga 1% chu hemi tana dah a ni a ti a. Kumin 2012 chhung hian Rs 120 Crore a awm a ni a ti. He scheme a TNT an rawn tel ta hi a lawmawm hle a ni a ti a. SBI chu hlawkna ringawt nilo, mipuite nena inpawh tawn hi a tum pawimawh tak pakhat a ni a ti.

Pu Sankar Gope, Regional Manager, SBI, RBO, Aizawl in Mizorama SBI in mipuite tana kumin 2012 chhunga a thil tihsak chi hrang hrang a tarlang bawk a ni.

TNT Vice Chairman Pu Biakvela chuan TNT dil ni miah lo, SBI in an mamawhte rawn zawt hmasa a, hetianga a taka an rawn pe ta mai hi, an hlimin an lawm tak zet a ni a ti a. Hetiang thil hlawm lian an la dawn ngai loh thu a sawilang bawk.

LPK 407 Truck Tipper hi Rs.8,64,923 /- man a ni.

Attachment

  • Loading attachment...