UD & PA Department bultumin Nimin (2.8.2016) khan I & PR Auditorium ah Atal Mission for Rejuvenation and Urban Transformation (AMRUT) Pu Zodintluanga, UD & PA Department Minister in a hawng. He hunah hian Pu Hmingdailova Khiangte, Parliamentary Secretary, UD & PA leh Dr. C Vanlalramsanga, Secretary UD & PA leh he Department a thawktu pawimawh tak tak te bakah Pu PC Lianhmingthanga, Mayor, AMC te, PHE leh AMRUT in a kaihhnawih Department dang aiawh hotu te an kal tha hle.

AMRUT Mission Mizoramah hawn theiha awm hi UD & PA Department leh an thawhpui Department dang PHE , PWD leh AMC te thawhrimna rah ani tia lawmthu sawiin khuallian Pu Zodintluanga chuan Urban Sector hi tunlai khawvel thangchho mekah hian a pawimawh tawh em em a, tunlai khawvel pawh hi ‘Urbanization Khawvel’ tiin a sawi theih tawh hial a ni a ti a. Urban Areas te hi “Engines of Growth” tia sawi an nih thu leh Mizoramah phei chuan a pawimawh zual emaw tihturin thingtlanga cheng aiin urban area-a cheng hi an thahnem tawh zawk a ni a ti.

India Sorkar pawhin Urban Sector ngaipawimawhin Mission Programme pawimawh leh lian tak tak panga (5) lai siam anih thu UD & PA Minister chuan a sawi a, chungte chu: (i) National Urban Livelihoods Mission – Khawpui a miretheite chawikanna turin; (ii) Swachh Bharat Mission (Urban) Khawpui vawnfaina atan leh bawlhhlawh sawngbawlna atan; (iii) PMAY – Housing For All – Khawpuia chenna in neilo zawng zawngte in neih tirna tur Scheme; (iv) Smart Cities Mission - India rama Smart Cites 100 din tur leh (v) Atal Mission for Rejuvenation & Urban Transformation (AMRUT)- India ram khawpui 500 thlanchhuahte tihhmasawnna leh mipui mamawh urban services tihchangtlunna atan.

Heng Central Sorkar Mission hlawm lian tak tak te hmang hian khawpui tih hmasawn hi Sorkar hmabak hautak leh pawimawh tak a nih thu leh Sorkar hmalakna pawimawh tak ‘New Economic Development Policy (NEDP)’-ah pawh Urban Sector lam hian hmun pawimawh tak a chan thu sawiin Pu Zodintluanga chuan Composite Urban Infrastructure Development Scheme for City and Towns kalpui mek anih dan leh ADB loan hmanga SIPMIU-in Aizawl khawpui tan water supply te, solid waste management te, sewerage management te leh tul dang atan chak takin hna a kalpui mek dan a sawifiah nghal a.Heng tarlan Scheme leh projects hi crore tam tak an nih hlawm avangin khawpuite tih hmasawnna leh tih changkan a mipuite tana khawpui nuam zawk dinna kawngah chakzawk leh tha zawka thawhna hmanrua remchang tak anih ngei a beisei thu a sawi. Heng Central Mission 5 te hmang hian hmalak tan mek a ni a. Heng Mission zinga mi, AMRUT hi June 25, 2015 khan Central Sorkar-a Ministry of Urban Development(MoUD) chuan a hawng a. He Scheme hi a bul tanna atangin Mizoram State chuan Service Level Improvement Plan (SLIP) leh State Annual Action Plan (SAAP) siam kawngah a thawk thain a thawkchak hle avanga India ram State zinga Central Apex Committee-in a approve hmasak pawl a lo nih theih tak thu a sawi bawk.

AMRUT hi hlawhtling taka kalpui tur chuan Department te leh AMC ten tan an laka, an hma theuhvah theihtawpa project te kalpui turin insan mar theuh a tul tak meuh a ni tiin Minister chuan Central Sorkar lam an inhawng hle a, 2015-16 leh 2016-17 atana SAAP te hi an approve rualin 1st Installment an release nghal zat zat zel a bei sei thu leh 2015-16 leh 2016-17 atana AMRUT hnuaia Project sum belhkhawm Rs.87.227crore lai sum hman tur a awm leh hna an thawkchho tan thei tur chu lawmawm a tih thu a sawi a, hetiang zat sum tangkai taka hman anih chuan khawpui hmel a tidanglam thei hle dawn a ni tiin, hemi bakah hian kum lo kal zelah mission period chhungin kum tin Rs45 crore vel zel la neih theih tur anih thu leh Reforms lamah thawh that anih chuan 10% Pool atangin sum engemawzat la hmuh tur a awm theih thu a sawi bawk.

Khualzahawm Pu Hmingdailova Khiangte pawhin thu sawiin Mizoramah hmasawnna a lang zel a, Khawpui cheimawina leh he lama thiamna nei te thahnemngaihna a fakawm a tih thu a sawi.

AMC Mayor Pu PC Lianhmingthanga pawhin thu sawiin India ram hmasawn chhoh dan leh hausak chhoh zel na chu Mizoram pawh in a zar kan lo zo ve a ni tiin tuna programme kal mek Housing for all a mirethei In Sak leh thil dang dangah te hmalak dan a sawi a. India ram a than chuan Mizoram pawh kan thang ve dawn a ni tih hria a, hei hi remchanga kan hman tangkai thiam a tul thu leh Mizoram tana thil tha leh tangkai tur duang chhuak tura ngaihtuahna kan sen a tul a ni tiin, hemiah hian thawktu te bakah Contractor te an pawimawh laiin mipui te beisei ang ngei a tih tur ti a thawh a tul dan leh Mizoram tana hmasawnna rahbi thar tuk chhuak zel thei tura mipui ten thurawn an pek a pawimawh thu a sawi bawk.

AMRUT hawnna programme hi Dr C Vanlalramsanga Secretary,UD & PA Department in a kaihruai a, PHE Department leh AMC atangin Power Point Presentation hmangin Water Supply, Drainage & Septage Management leh Non – Motonised Transport and Park Improvement chung chang te thlir ho a ni bawk.