Vawiin khan New Secretariat Complex-ah Public Health Engineering (PHE) Engineer-in-Chief Office sakna tur lungphum chu PHE changtu Minister Pu Zodintluanga’n a phum. 

Pu Zodintluanga chuan tun hnaiah PHE Department chuan hmasawnna tam tak a nei tiin “hmana kan tih thin dan a ni” tih kal pelin thil thar tam tak kan hmu, a ti. Aizawl khawpui chhunga tui sem darhna pipe hlui tawh tak tak te a thara thlak mek a ni a, tui lak luhna pipe lian feeding line thlak turin contractor thlan a ni tawh, a ti a. Pump house leh filter thar hawn theiha peihfel a nih tawh thu leh tui meter pawh changtlung leh tha zawka thlak thuai a nih tur thu a sawi bakah tunlai thiamna hmang tangkaiin mipuiin tui an dawn tur thu message hmanga hriattir lawk thin an ni, Minister chuan a ti. Mizoram hmun hrang hrangah tui in tur thianghlim leh hrisel, hniang hnar zawka mipuiin an dawn theih nana PHE Department-a thawktute thawhrimna fakin Minister Pu Zodintluanga chuan Engineer-in-Chief Office sak thar tur pawh Mizoram mipui tana nasa lehzuala hna an thawh theihna tur hmun a nih ngei theih nan duhsakna a hlan a ni.

Engineer-in-Chief Office hi October ni 12, 2017 ah sak tan niin thla sawmpariat chhunga sak zawh hman tura ruahman a ni a. Basement pahnih leh ground floor tiamin floor thum a nei ang. Office sak nana sum sanction hi cheng nuai 961 a ni.

Lungphum phum puala inkhawm tawi buatsaih hi PHE Secretary Pu V.Lalremthanga’n a kaihruai a. PWD (Project Circle) Superintending Engineer Pu Lalruatkima’n technical report a pe a, PHE Department Engineer-in-Chief Pu Lalmuanzova’n lawmthu sawiin hun a khar a ni.

Attachment

• Loading attachment...