Pu Zodingtluanga, Sports & Youth Services Minister chuan vawiin khan Agriculture Conference Hall-ah Seminar on Sports Psychology for Coaches & Trainers a hawng. He seminar hi Sports & Youth Services Department; Mizoram Psychology Association leh Department of Psychology, Mizoram University te tangkawp buatsaih a niin hawnna inkhawm hi Pu Zothanmawia, Director, Sports & Youth Services in a kaihruai a ni.

Pu Zodintluanga chuan Coach leh Trainers te tan hetiang ang seminar kan mamawh tawh a ni tih hriatchhuah hi a lawmawm a tih thu sawiin, vawiina seminar a lokal coach leh trainer te chu zirlai naupang anga inngaia an hriat loh te zawt hreh lo turin a chah a. Vawiina an thil zir hian Mizoram pum a fan dawn avangin an theih tawp chhuaha seminar hi hmang tangkai turin leh vawiin hi hetiang lama inzirtirna bultanna a ni tih hriaa, a hlawhtlinna chu infiammite ah thui takin a lang dawn a ni a ti. Minister chuan Mizoramah chuan infrastructure tha te kan neih tawh bakah kan physical te pawh a tha tawk tawh a, mahse mental fitness ah hian hmasawnna tur tam tak kan la nei a ni a ti bawk.

Pu Zothankhuma IAS, Secretary Sports & Youth Services chu khual zahawm niin infiammite hi ramdanga an kala hnamdang kara an awma tawngte an lo thiam loh hian psychological problem te an nei thei a, chuvangin hetiang ang training hi a tul tawh a ni tih hriain SYS Department chuan vawiin seminar hi buatsaih a ni a ti.

Hawnna inkhawmah hian Prof. Zokaitluangi, Head of Department, Psychology, MZU chuan seminar chungchang sawihawnna a nei a. Seminar resource person te chu Dr. Zoengpari, MZU; Dr. C. Lalfakzuali, MZU leh C. Lalremruati, Ph D Scholar, MZU te an ni.