Institute of Advanced Study in Education (IASE) chuan nimin khan B.ed Multi-Mode Programme leh UGC Sponsored Sports Infrastructure (Auditorium) hawnna hun an hmang a. Higher & Technical Education Minister Pu R.Romawia, School Education Minister Pu H.Rohluna leh Parliamentary Secretary Pu Joseph Lalhimpuia te'n an hmanpui a ni.

Higher & Technical Education Commissioner Pu Lal Nghinglova chuan programme hi kaihruaiin Minister Pu R.Romawia’n Sports Infrastructure (Auditorium) a hawng a. He Auditorium hi UGC atanga cheng nuai 70 an dawn hmanga sak a ni a, kum 2012 khan sak tan niin March, 2015 ah zawh fel a ni.

Minister Pu H.Rohluna chuan B.Ed Multi-Mode Programme a hawng a. B.Ed Multi-Mode Programme hi National Council for Teacher Education (NCTE) phalna angin Mizorama zirtirtu thawklai, training la nei lo te tan a bik taka buatsaih a ni.

IASE ah hian zirtirtu nghet 11 leh part time Lecturer 6 an awm a. B.Ed regular student 120 leh M.Ed student 25 an awm. Heng bakah hian B.Ed Multi-Mode Student, IASE Centre-ah 100, CTE Centre-ah 100 an awm bawk.