India ram chhung infiamna hrang hrang tihhmasawn a, infiam mite khawvel huapa inelna hrang hrang ah te India aiawh a tel thin chherchhuaktu a ngaih Petroleum Sports Promotion Board (PSPB) huaihawtin nimin atang khan Aizawl-ah IXth PSPB Inter-Unit Billiards & Snooker Tournament 2012 chu neih tan a ni a. Tournament hi nizan dar 7:30 P.M. khan Aijal Club-ah Sports & Youth Services Minister Pu Zodintluanga’n a hawng a ni.
Pu Zodintluanga chuan Snooker leh Billiards infiammite chu lo lawm in, hetiang Tournamant lar leh chhuanawm Aizawl-a an rawn buatsaih chu ropui tiin a buatsaihtu te chunga lawmthu a sawi a. Sports Minister chuan Mizo thalai te chu infiamna chi hrang hrang a talen an neih tha a, sports ruhrel tihhmasawn leh tihchangtlun nan Sawrkar-in theitawp a chhuah zela, Catch Them Young Policy hmalakna in infiamna lamah rah tha leh hlawhtlinna a awm chho zel thu a sawi bawk. Mizoram in coach tha infiammi te hlawhtling taka kaihruai thei tur a mamawh em em a, PSPB hotute pawh hemi lamah hian Mizoram pui turin a ngen nghal a. Snooker leh Billiards chu Mizoram tan infiamna thar a ni a, mahse Tv. Lalrina Renthlei hlawhtlinna hi he infiamna hi Mizo thalai ten an tupui hle tilangtu a ni a ti bawk.
Tournament hawna inkhawm ah hian Billards lamah khawvel hriat hlawh, World Professional leh World Amateur Billiards Champion vawi engemawzat lo ni tawh Pu Geet Sethi pawhin thu sawiin Mizoram chu hmun nuam tak mai ‘absolute nirvana’ a ni a ti a. Sports Minister Pu Zodintluanga’n Tournament hi Aizawl a neih a nih thei nan theitawp a chhuahsaka, kawng engkima a puih avangin lawmthu a sawi bawk a ni. Pu Geet Sethi hi Sorkar Laipui in Padma Shri, Arjuna Award leh Rajiv Gandhi Khel Ratna Award ten a lo chawimawi tawh a. He Tournament ah hian Pu Pankaj Advani, Snooker leh Billiards lamah tunhnaia khawvel huapa hming lo cher tawh pawh a tel ve a. Anni pawh hi Padma Shri, Arjuna Award leh Rajiv Gandhi Khel Ratna Award te in chawimawi a ni tawh bawk a ni.
Hawna programme ah hian Pu Devendra Joshi, Captain BPCL chuan infiammite thu a tiam tir a, Pu John Kima President, MBSA pawhin thu a bawk a. Hawna programme ah hian Sports & Youth Services Secretary Pu R. Lalvena, IAS; MSSC Secretary Pu Laltlanthanga leh Mizoram State Olympic Association Secretary General Pu Zoliana Royte te pawh an tel a ni.
IXth PSPB Inter-Unit Billiards & Snooker Tournament 2012 hi Oct ni 1 khan tan a ni a, October ni 6 thleng a awh dawn a ni. He Tournament ah hian India oil company hrang hrang – ONGC, GAIL, BPCL, IOC, HPCL leh OIL aiawh 32 te an in lan a ni. PSPB hi infiamna lamah India oil company hrang hrang inchhunfin, infiamna hrang hrang promote a, infiammi hmingthang tak tak te chherchhuaktulian berte zing ami nia ngaih a ni.
