Nimin October ni 2 (thawhtanni) zing dar 10:00 khan Mizoram State AIDS Control Society leh Association for Voluntary Blood Donation tangkawp bultumin National Voluntary Blood Donation Day 2012 chu Aijal Club-ah neih a ni a. Pu S. Laldingliana, Parliamentary  Secretary Health chu khuallian a ni. 

Pu S. Laldingliana chuan chuan thisen pek hlut leh ropui zia sawiin tunhma hunah chuan ral leh sahrang hma a zam ngai lo, thian chhan thih ngam mi huaisen te khan fak an hlawh thin a, tunah erawh chuan damlo mamawhtu te tana thisen pek tluka thil hlu a awm lo a, chuvangin midangte nunna chhanhimtute tluka mi ropui leh ngaihsanawm an awm lo a ni ti, a ti . Thisen pek kawngah Mizoram dinhmun hi hmuh theihin a sang chho zel a, za-a-za hawlh chho thei turin kan zavaia tan lak tlanga ngai a ni, Parliamentary Secretary chuan a ti bawk.                                                             

Blood Donation Day lawmna inkhawm kaihruaitu Pi Esther Lalruatkimi, Secretary, Health & Family Welfare Department chuan inlawmna thu sawiin Pi Lalhmingliani, QM, MSACS chuan report a pe a. Dr. Eric Zomawia, Project Director MSACS leh Dr Lalthanzuali, HOD, Model Blood bank hnen atangin thusawi ngaihthlak a ni bawk.

Damlote hnena vawi 20 thisen pe tling chinte hnenah chawimawina certificate hlan an ni bawk a. Heng lawmman te hi Pi Esther Lalruatkimi leh Pu S. Laldingliana ten an hlan a ni                                                      

Inkhawm zawh hian thisen pek runpui neih nghal niin mi 71; mipa 57 leh hmeichhhia 14 in thisen an pe a ni    

Thisen pek hi khawvelah  kum 1901 atanga neih tan a lo ni tawh a. Mizoram-ah hian Association angin kum 1991 atang khan din niin, damlo mangang thisen mamawh ten thisen tam tak dawngin nunna engemaw zat chhanhim a lo nih phah tawh a ni.