Vawiin khan Pu Zothangliana, Parliamentary Secretary for Higher and Technical Education chuan tuna Lai Student Association ten zirtirtu post ruak hnawhkhah an phut mek chungchang a sawifiah.

Pu Zothangliana chuan Higher Secondary School zirtirtu hna chu Mizoram Public Service Commission (MPSC) kaltlanga lak tur an nih avangin sawrkar chuan 27.8.2014 khan Mizoram Public Service Commission ah heng hnaruakte hnawhkhahna tur ruahmanna a siam turin a hriattir a, a hnawhkhahna tur buatsaihna atana sawrkar lam a tanga tih fel ngai zawng zawng pawh Mizoram Public Service Commission ah hian thehluh nghal a ni bawk a ti.

Parliamentary Secretary chuan Lawngtlaia Government Region Higher Secondary School a zirtirtu hnaruak chauh nilovin school danga post ruakte hnawhkhahna tur huam telin MPSC hnenah hian sawrkar chuan a thehlut a MPSC pawhin rang taka a bawh zui a beisei thu a tarlang tel bawk.