Vawiin chawhnu khan Health Minister Pu Lal Thanzara chuan Chanmari, Ramhlun Road a hawn thar, insawizawina hmun changtlung tak, International standard gym nia chhal, BHHO Fitness Club chu a hawng a. BHHO Fitness Club, Aizawl hi BBHO Gym & Fitness Centre(P) Ltd, Gurgaon nen a inthlun zawm a ni.

BHHO Fitness Club hawngtu Health Minister Pu Lal Thanzara chuan hriselna kawngah zofate kan thanharh a hun tawh a ni, a ti a. Hriselna nei tur chuan taihmak a a ngaih thu sawiin taksa insawizawi a pawimawh tluk zetin zuk leh hmuam bakah ei leh in thlenga chin tawk hriat a ngai a ni a ti. Aizawl khawpui ah phei chuan boruak thianghlim hip chunga exercise lakna hmun tur a awm meuh tawh lova, trainer ten an thutchilh leh an vil rawn gym changtlung tam zawk kan mamawh tawh a ni a ti a.Thalai-te leh upa deuh te tan pawh Gym kal hi kan intihhmuh a ngai a ni a ti.

BHHO Fitness Club hi zing dar 6:00 atanga zan dar 9:00 thlenga hawn tur a ni a. Fitness Instructor 6 in an vil anga, gym chhungah hian Group fitness studio, treadmills, multi-gym, machine hrang hrang,weights, Health bar, steam baths, inbualna, thawmhnaw thlakna hmun etc. dah a ni a. Gym membership hi thla 6 atan leh thla 12 atan then hran a ni.

BHHO Fitness Club hawnna programme ah hian Founder Director Pi Bharti Singh leh Pu Daniel Hauhnar, Director, BHHO Fitness Club, Aizawl ten BHHO Gym chungchang leh Gym a Fitness programme hrang hrang kalpui dan tur te an sawi a. Hawnna programme neih zawh hian Workshop on fitness neih nghal a ni.