Nimin (August ni 31, 2014) tlai khan Learn to Earn Services Pvt. Ltd., Delhi-a Hospitality Management, Business & Commerce leh Finance & Accountancy training turin thalai rual mi 44-te thlahna hun Ch. Chhunga Bus Terminal Conference Hall, thuampuiah neih a ni. He hun hi Pu Rotluanga, Director, Labour, Employment & Industrial Training Department leh Mizoram Youth Commission member ni bawk chuan a hmanpui a.

Training turte tana hriattur pawimawh hrang hrangte sawiin, chhel leh taima taka an tih turte hlenchhuak turin a chah a ni. Training senso hi Sorkar laipuia Ministry of Labour & Employment hnuaia Directorate General of Employment & Training tum tur a ni a. Training petu tur Learn to Earn Services Pvt. Ltd.-te hian training chhuakte hi India ram hmun hrang hrangah leh foreign-ah te hna an lo zawn sak dawn a ni. Learn to Earn Services-te vek hian September thla tawp lamah hian Banking Sector-a thawk tur graduate chin thalai engemawzat hruaithlak leh an tum thu Department hotute an hrilh bawk. Training turte hi Varun Gabba, Project Head, SDIS Scheme chuan a hruaithla a ni.