Nimin (August ni 3) chhun khan Mualthuam Community Hall-ah Mualthuam leh Kanghmun Handloom Cluster-a puantah zirchhuakte hnenah puantahna In sakna tur leh puantah khawl semna hun hman a ni a. Social Welfare Minister Pu PC Lalthanliana chu Khuallian niin a hmanpui.

Pu PC Lalthanliana chuan India ramah agriculture dawta mipuite tana eizawnna siam hnem bertu chu Handloom sector a ni, a ti a. Kum 2009 khan Mizoramah puantahtu 39894 kan awm a, puantahtu lo pung chho zelin, thenawm state ah te Mizo puan kan thawnchhuak thei ta hial chu hmasawnna pawimawh tak a ni, a ti. 12th Five Year Plan-a North East Region Textile Promotion Scheme hnuaiah Mizo Puantahtute hamthat nan Mizoram sawrkar chuan DPR 17 a lo buatsaih thu leh sawrkar laipui in a pawmsak avanga Cluster Development Programme hmun 17-ah kalpui a nih thu a sawi. Sawrkar laipui chuan puantahtuten awlsam zawka la an lei theih nan Weaver’s Credit Card Scheme kaltlanga bank ten loan cheng nuai 3 thleng, 3% lek a pung an pek theih thu a sawi bawk.

Minister chuan kawngvawn puantah kalsan tur a khawl changkang Mualthuam, Kanghmun leh a chhehvel mi 100 hnena pek a ni chu lawmawm tiin Model Cluster hial ni thei turin taima leh tangkai taka hmang turin a chah a. Sawrkar atanga tanpuina ringawt beisei lovin, sawrkar scheme te chhawr tangkai leh ti hlawhtling tur chuan theihtawp kan chhuah ve a ngai a ni, a ti a. He training hlawhtlinna bulpui ber chu department leh khawtlang hruaitute thawh hona that vang a ni, a ti.