Mizoram Legislative Assembly a Public Account Committee (PAC) chuan an chairman Pu C. Ramhluna MLA, hovin vawiin chhun khan Serchhip-a Jawaharlal Nehru Hospital Complex a sak AYUSH Building leh Trauma Centre te tlawhin an endik a, PAC Chairman leh member te - Pu B. Lalthlengliana MLA, Pu Lalduhawma MLA, Lt.Col.Z.S. Zuala MLA, Pu K. Lalrinthanga MLA, Pu R. Lalrinawma MLA (Chairman, Law Commission) leh Pu V. Lalrobiaka (Chairman ZIDCO) te hi Serchhip District Chief Medical Officer leh a thawhpui ten an lo dawngsawng a ni.

PAC chuan AYUSH Building leh OPD tlawhin an endik a, AYUSH Building hi kum 2011 May ni 27 a hawn niin, tunah hian AYUSH Doctor pathum awmin sub-ordinate staff pakhat mah an nei lova, hei vang hian Hospital khum 10 awmna pawh anih dan tur ang takin kalpui theih a la ni lova, Dispenser, Nurse leh IV-Grade te pek an nih chuan anih dan tur ang takin pangngai tak a kalpui nghal theih a nih thu PAC te hi hrilh an ni. OPD pawh hi a building nei mahse subordinate staff an awmloh avangin tunah chuan J.N Hospital a Operation Theatre hlui chu OPD atan an hmang ve rih a, Hospital staff ten an hmui rih tawp bawk a ni. AYUSH Building in thawktu indaihlohna avanga a thawh tur ang a la thawk tha thei rih lo chu hriatthiam har an tih thu leh Mizoram chhung District tinah hetiang harsatna hi an hmuh thu PAC Chairman Pu C.Ramhluna chuan a sawi a, a theih ang ang a harsatna te sutkian pui dan kawng zawnpui an tum thu sawiin, tun dinhmunah chuan AYUSH Building hi Hospital anga kalpui a harsat pawhin OPD emaw tal chu kalpui nghal dan ngaihtuah turin leh thawktu tur pawh RKS hmang tangkaia MR lak dan kawng dap turin District Medical Superintendent chu thurawn an pe a ni.

PAC te hian Serchhip J.N. Hospital a Trauma Centre sak chu tlawh nghalin an enchiang a, Trauma Centre sak dan chu tha an tih thu leh lungawithlak an tih thu sawiin NEC kaltlanga hmalakna hlawhtling hle ni a an hriat thu leh, thawktu staff nurse thlenga an mamawh a phuhru nghal chu tha an tih thu an sawi bawk.

PAC Chairman Pu C.Ramhluna chuan Mizoram District hmun hrang hrang an tlawh kual hnu ah AYUSH bik in harsatna a tawh chu a in ang tlang hle a an hriat thu leh hemi harsatna hi sawrkarin a sutkian thuai a beisei thu a sawi a, AYUSH Directorate hran neih thuai pawimawh an tih thu leh tul hle a an hriat thu a sawi bawk. Pu C. Ramhluna chuan Lunglei bul Hauruang khua a Incinerator (Bawlhhlawh halna) Health Department in a siam chu a hmuna enkawl zui mumal tu an awm loh avangin hmantlak loh ah a chhuak mai dawn a an hriat thu leh, a rang thei ang bera Lunglei Town Area hmun remchang a he khawl hi sawn chhuak turin Health Department hian ruahmanna siam se an duh thu a sawi bawk.