Nimin 12.6.2012 khan Revenue leh Soil & Water Conservation Minister Pu J.H. Rothuama leh Dy. Speaker Pu John Rotluangliana te chuan Tuirial Hydel Project hna kal mek lai leh Serlui ‘B’ Hydel Project te chu a hmunah an tlawh a ni.
Minister leh Dy. Speaker te hi Tuirial Hydel Project atana Project Manager leh NEEPCO General Manager ni bawk Pu N.K. Rao chuan lo dawngsawngin an hnathawh tawhte leh an thawh lai mek te a hmunah a enpui a, hna thawh hmabak la awm te chu chipchiar takin a hrilh a ni. 60 MW pe chhuak thei tur Tuirial Hydel project hi compensation pek tur a tam lutuk avangin kum 2004 khan NEEPCO chuan a lo chawlhsan tawh a. Chief Minister Pu Lal Thanhawla’n nasa taka a nawr hnuah sorkar laipui-in he hna atana pawisa hman tur cheng vaibelchhe 913 chu remtihpui leh hnuah kumin January ni 11 atang khan NEEPCO hian hna a thawk tan leh thei ta a ni.
Tunah hian diversion tunnel pahnih laih turah pakhat chu laih tlang ni tawhin tui luang lai lak penna atan peih fel a ni tep tawh a. Tunnel dang pakhat pawh metre 45 chauha laih tlang loh la niin hei pawh hi reilotea laih tlang an in beisei thu NEEPCO hotute chuan Minister leh Dy. Speaker te hi an hrilh a ni. Tunnel dang pakhat ‘power tunnel’ an tih pawh laih mek a ni a, reiltoea laih zawh theih a nih tur thu an hrilh bawk.
Saiphai leh Saipum inkar kawng laihzauh mek chuan hmanrua lakluhna chungchangah harsatna a siam sak thu NEEPCO hnathawkte hian Minister leh Dy. Speaker hnenah an thlen a. Tuikhuahna atana hmanrua ber tur lung an lakna Mauchar quarry pass chu sorkarin a tihfel thuai an mamawh thu te an hrilh bawk a ni. Harsatna an tawh mekte hi sutkian a nih chuan kum 2014 chawhma lama zawh fel theih an inbeisei thu NEEPCO hotute chuan an sawi.
Nimin vek khan Revenue Minister Pu J.H. Rothuama leh Dy. Speaker Pu John Rotluangliana te chuan Serlui ‘B’ Hydel Project tlawhin heta hna thawkte hian kawlphetha an pek chhuah dante an lo hrilhfiah a ni. Tunah hian Serlui ‘B’ Hydel Project-a khawl pathum zinga pahnih chu tih nun niin hengte hian 7MW leh 8MW an pe chhuak reng a ni.
Minister Pu J.H. Rothuama hian Sakawrhmuituai tlang, Lungdai rama Soil & Water Conservation Department-in ‘River Valley Project’ hnuaia chhungkaw 108 atana terrace an laihsak te a hmunah a en nghal a. Vawiin ni 13.6.2012 hian Kolasib-a a department chan Revenue leh Soil & Water Conservation Office te a tlawh bawk a ni.
