Ram chhung mipuite dinhmun chawikanna tura Sorkar laipui ruahmanna chi hrang hrangte a chhawrtu tur mipuite’n an hriatchian theihna tura inzirtirna beihpui, Public Information Campaign chu nimin khan Darlawnah tan a ni.

 

 

Campaign hawnna inkhawm, Darlawn Community Hall-a buatsaih hi Core Committee Chairman Pu C. Lalrosanga, Doordarshan Director leh All India Radio DDG nibawk chuan kaihruaiin, khuallian bialtu MLA Pu RL Pianmawia, Deputy Chief Whip chuan Central Sorkar duanchhuah Scheme leh Programme chi hrang hrangte chu a nih dan tur ang taka hman tangkai a nih chuan thingtlang mipuite’n hmasawnna chi hrang hrang an hmu dawn a, chutiang taka chhawr tangkai thei tur chuan a kalpuitu Sorkar hmalakna chauh ni lovin mipuite pawhin rinawm tak leh taima taka an tihve turte an hlenchhuah a tul a ni a ti. Pu RL Pianmawia chuan Tuivawl bial chu Aizawl District chhunga Assembly bialte zingah khaichhuah ngai ber zing a mi a ni tih sawiin, Deptt. hotute pawhin theihtawp chhuaha tan an lak a tul a ni a ti a, mirethei chenna in sak sakna, IAY erawh a bial chhunga permanent Waiting list chhungkaw 1166 zingah kumin chhungin chhungkaw 17 chauhvin an dawng thei dawn tih sawilangin, tam zawk hmu tura tanlak a tul hle a ni a ti.

Hemi hnu hian khualzahawm pathum, Sakawrdai Civil SDO Dr.Lalngura Tlau, Darlawn BDO Pu Ngulsangvela, Darlawn VCP Pu RD Lawmkima te pawhin thu an sawi a, Inkhawm kaihruaitu Pu C. Lalrosanga chuan Sorkar laipui scheme leh Programme chi hrang hrangte chu a nih tur ang taka mipuiten an chhawr tangkai theihna turin, a kalphung kimchang an hriatchian a tul a, chutiang taka mipuite’n an hriat chian theih na turin Campaign hi buatsaih a hi a, mipuite pawhin an hriatchian loh apiangte zawhchhuahna remchanga an hman thiam a pawimawh a ni a ti.

Khuallian Pu RL Pianmawia chuan DAVP te’n thlalak hmanga central sorkar hmalakna chi hrang hrang an phochhuahna, Photo Exhibition pawh a hawng nghal a, Campaign ah hian Central Scheme leh Programme te kalpuitu Deptt hrang hranga mithiamte chuan mipui pungkhawmte chu zirtirna pe-in zawhna awm apiangte pawh a theih angin an chhang nghal zel a ni.

Public Information Campaign hi PIB bultum-in, Doordarshan, All India Radio, Field Publicity, DAVP, Song and Drama Division, IMPCC, MJA leh Mizoram Sorkar tanghote buatsaih a ni a, Campign huaihawt tur hian PIB hotupa Pu Mangjangam Touthang, Doordarshan News-a Dy. Director nibawk leh thawktu dangte an thawk chhova, Campaign buatsaihtute pual hian Pu RL Pianmawia chuan zanriah a buatsaih sak a ni.