Vawiin chawhma ah khan ATI Auditorium ah Public Prosecutors leh Case Investigating Officers te tan nikhat training Law & Judicial Department chuan a buatsaih chu Law Minister Pu Lalsawta’n a hawng a.
Fuihna thu sawiin Law Minister Pu Lalsawta chuan thil tisualtu, dan bawhchhia, hrem phu ngawih ngawih te chhuah an ni leh thin chu a rilru nat thlak a, mipui in danhnuai ah zalenna leh himna a awm tih an rin tlat theihnan Public Prosecutors leh Case Investigating officers te an tan nasat a ngai a ti. Tunhnai mai ah pawh Mizoram ah thil tha lo tak tak a thlen fo tawh thu leh mihring nunna a hlu lo sawt anga ngaih theih tur thil a awm leh thin chu vanduai thlak a tih thu a sawi a. Mihring nun baka thil hlu a awm lova, mihring nunna hlut leh zah lohna hmun chu khawilai mah hmun nuam a awm lo a ti. Misual hrem an nih theihna turin evidence lak khawm leh court rorelna inkhaidiat zawng zawng inpuahchah fel sa thlap a hmachhawn thei turin Sawrkar ukil leh hnuchhuitu te an tan a ngai nasa a ni a ti a. Sawrkar, mi thenkhat ten an khing hneh fo chu tih tawp a hun tawh tih tarlang in Sawrkar Ukil leh hnuchhuitu te chu mi thiam ber ber thlan khawm an nih anga an theihna te pho chhuak turin a fuih a ni.
Thusawitu dang Law & Judicial Secretary Pu R.Thanga pawn Zoram mipui ten dikna a lal ber a, court rorelna ah pawh hnehna a chang thin tih an rin ngam zel na turin Public Prosecutors leh Investigating Officers ten an theih tawp an chhuah a pawimawh thu a sawi a. Training ah an rilru pe turin Prosecutors leh Investigating Officers te chu a fuih a ni.
Training hawnna programme hi Pu Zaihmingthanga Ralte, Joint Secretary, Law & Judicial Department in a kaihruai a. Kalkhawm te mithiam sawm bik ten topic 3 : “ Procedural requirements in course of investigation an trial of criminal cases”, “Procedural requirements in course of investigation and trial of ACB Cases”, “Procedural requirements in course of investigation and trial of narcotic cases” leh “ Lapses on the part of investigation and trial of criminal cases particularly with reference to appeal cases” ah te zirtirna an pe a ni.
