"Ram pawn thleng atanga kan pi pute sulhnu leh ram leilungte zir tura hnam dang lo kal hi a ram neitu ngei ten kan hmanlai nun zirchian kawnga tan kan lak theihnan kan Mizo thalaite cho chhuaktu ni se" tiin Pu Joseph Lalhimpuia, Parliamentary Secretary, School Education, Trade and Commerce, etc chuan a sawi. He thu hi vawiin (10.12.2015)-a Champhai District khaw hrang hrang tlawh a zirtirtute a kawmnaah a sawi a ni.

Parliamentary Secretary hi Champhai District a khaw hrang hrang - Farkawn, Samthang, Dungtlang, Leithum leh Vangchhia te tlawhin, School hotu thenkhat te kawmna hun a hman bakah an harsatnate a ngaihthlak sak a. Sorkar sikul zirtirtute zingah hian thiamna nei ngah leh tha tak tak an awm thu sawiin, thahnemngai taka an thawh chuan nakin lawkah enrollment pawh a tam chho zel ang tih a beisei thu a sawi a. Zirna hi a bulthut atangin thiamna naupangah tuh mai bakah, zirna sang zawk kalpui theih dan tur te ngaihtuahpui turin zirtirtute chu chah a ni.

Parliamentary Secretary chuan tuipuiral tlangdung chu Mizo hnam zinga hmun pawimawh Pipute sulhnu awm tamna anih avangin a ram neitu ten kan hlut thiam mai bakah kan phochhuah thiam a pawimawh a tih thu a sawi a. Kan pipute sulhnu hi Mizote lungkuaitu ber ni mah se zirchiang tak tak tura hmalak kawngah hian hma sawnna tur kan la nei tam hle a ni tiin, hemi kawngah hian kan thangthar mithiam te an pawimawh thu leh, kan pi leh pu te chanchin hriatchian duhna leh hlutna kan zirlaite ah pawh kan tuh a ngai a ni, a ti a.

Parliamentary Secretary chuan Archaeological Survey of India-in "National Importance" atan a vuah leh Ministry of Culture-in "ADARSH Monument" atan a puan Kawtchhuah Ropui chu tlawh in, he hmun a lung ker hrang hrangte chu engtik hunlai taka siam leh phun nge an nih ang tih zirchiang turin INTACH leh Vangchhia khua hmalaknate a ngaihthlak sak a. Carbon Dating tih a pawimawh hmasak thu leh eng hun lai ami pawh nise, kan pipute sulhnu ngei a ni tih kan chian a tul a ni tiin sawifiahtu Pu KC Doliana, Vangchhia Middle School Headmaster chuan a sawi a ni.

Parliamentary Secretary hi Pu Lalzirmawia, Addl. Secretary, Education Department leh Champhai DC Pu Vanlalngaihsaka bakah Official dangten an tawiawm a ni.