Nimin khan Mizoram University Pro Vice Chancellor, Prof. R.P. Vadhera chuan National Level Workshop on Quantum Science and Technology khuallian niin, Pachunga University College-ah a hawng a. Workshop hawnna inkhawm hi Dr. Tawnenga, Principal PUC chuan a kaihruai a ni.

Workshop-ah hian TIFR atangin Dr. R. Vijayaraghavan, IIT Bombay atangin Dr. Suddhasatta Mahapatra leh Dr. Sai Vinjanampathy te telin; Institute of Physics, Bhubhaneswar atangin Prof. Pankaj Agrawal a lo tel thei bawk a.

An ni hian tun hnai maia khawvel scientists ten an buaipui computer technology a revolution thlen thei tur Quantum Computing lam an sawi ber a. Tuna kan computer hman lai technology hi chu classical computing ti a sawi a ni tawh a. A tirah chuan vacuum tube transistor hmang a room zau deuhah computer hi siam a ni thin a, kum 1940 chho vela semiconductor transistor hmuhchhuah anih hnu atang khan vacuum tube chu IC te reuh te te in a rawn luah tan a. Chung IC-ah chuan transistor tam tak On leh Off, bial leh pakhat, binary digit an tih mai ang a awm in tuna khawvel in kan hman theih ang hian hna a thawk thin a ni.

Technology hma a sawn zel angin transistor pawh te reuh te te in an siam thiam ta a, phone leh laptop lian lem lo tak ah pawh hman deuh a supercomputer lian pui pui hnathawh theih ang thawk thei transistor an dah ta a. Amaherawhchu, tuna computer design ang a supercomputer tha ber ber te pawh hian data tarn tham lutuk chhut nan chuan tlin loh chin a nei a. Transistor ai ah quantum bit hmang a quantum computer siam anih erawh chuan quantum bit pakhat ringawt pawn transistor sing tarn tak hnathawh ang a thawh theih dawn avangin science lam emaw thil dang ah pawh data tarn tham lutuk reilo te a chhut chhuah zung zung nan a la tangkai dawn a ni.

Workshop atana senso zawng zawng hi Department of Science and Technology, Government of India bultum a ni a. PUC bakah Mizoram chhung a zirna in hrang hrang atangin he workshop-ah hian an rawn tel a, mi 70 dawn an tel thei a, nithum chhung awh tura ruahmanna siam a ni.