Vawiin khan Pachhunga University College chuan PUC Multipurpose Auditorium-ah kum 60 an din champha Diamond Jubilee lawmna leh inhlantharna hun neiin,  Prof. K. R. S. Sambasiva Rao, Mizoram University Vice Chancellor chuan a hman pui.

Principal, Dr. Tawnenga chuan thu sawiin kum 60 lai Pathian hruaina hnuaia hlawhtling taka an lo kal tawh chu lawmawm a ti a, he College hmasawnna tura tha lo thawh tawh zawng zawngte hnenah lawmthu a sawi. MZU Vice Chancellor, Prof. K. R. S. Sambasiva Rao pawhin thu sawiin, Pachhunga College University hmasawnna chu ropui a tih thu te, he College hi India ramah pawh nep lo leh Northeast ah phei chuan a tha ber pawl nia a hriat thu leh a chhuan thu a sawi a, he College hmasawnna tura thawhpui a inhuam reng thu a sawi.

PUC Diamond Jubilee lawmnaah hian he College a lo thawk tawh, Principal, zirtirtu leh non-teaching staff la damte; PUC dinna tura sum leh tha thawhtu Pu Pachhunga te chhungkua leh Pu H. K. Bawichhuaka te chhungkua; College Governing Board hmasa bera member la dam awm chhun Pu J. Malsawma leh he College zirlai batch hmasa ber la damte hnenah lawmpuina thil pek hlan an ni. He hunah hian College zirlaite leh zirtirtuten inhlantharna thu an chhiar rual bawk. College a zirlaite leh thawktute pawisa thawhkhawm ‘Charity Fund’ atangin Aizawl chhunga Children’s Home pangate hnenah tanpuina pek a ni bawk. He hunah hian PUC zirlaite’n lam leh zai mawi tak tak entirin hun hlimawm tak hman a ni.

Pachhunga University College hi kum 1958 August 15 khan ‘Aijal College’ tih hming pua din a ni a, Mizorama College ding hmasa ber a ni. A dinna tura sum thawhtu Pu Pachhunga a boral hnuin ‘Pachhunga Memorial College’ tia a hming thlak a ni a, kum 1965 khan Assam sorkar hnuaiah dah niin, ‘Pachhunga Memorial Government College’ (PMG) tia thlak a ni a, kum 1979 a NEHU hnuaia Constituent College a dah a nih atangin ‘Pachhunga University College’ tih hming hi a lo pu ta a ni.

Pachhunga University College ah hian Bachelor degree zirna department 23 a awm a, kumin khan Bachelor of Business Management zirna leh Post- Graduate zirna department thar Philosophy, Mizo leh Life Science te hawn thar a ni. PUC College hi UGC hnuaiah Community College leh College with Potential Excellence a ni mek a, ISO Certified Institution niin kum 2016 NAAC Accreditation cycle hnuhnung berah A+ (A Plus) grade an hmu bawk a ni.

 

Attachment

  • Loading attachment...